Vefsetur Stóra Jóns

Kíosk

2009-05-04T09:31:00.003Z

Ég komst eins nálægt því að vera skotinn og mögulegt er, þegar maður er Íslendingur, kaupir ekki hass og klæðir sig eins og hippi, ekki gangster, um daginn. Venjulega vakna ég ekkert sérstaklega snemma. Venjulega fer ég á fætur eftir 11 og er oftast á leiðinni út úr kíoskinu á horninu þar sem ég á heima klukkan korter yfir 12. En kl. korter yfir 12 á þriðjudeginum fyrir viku síðan þeystust tveir menn á mótorhjóli framhjá kíoskinu með vélbyssur og skutu mann sem var að labba þar fyrir utan (hann hafði víst einhver örlítil gengis-tengsl, en það er ekkert búið að sanna.) Fólk hljóp á eftir mótorhjólagenginu, bróðir mannsins hrópaði eftir hjálp og stemningin í götunni stigmagnaðist allsvakalega þannig að löggan lenti í smá slagsmálum.

Ég fór hinsvegar á fætur kl. 10 þennan dag og labbaði þess vegna út úr kíoskinu klukkutíma áður en venjulega. Efast um að ég komist nokkuð nær því að verða skotinn en þetta, og þess vegna það versta yfirstaðið fyrir mig. Engin ástæða að vera hrædd um líf mitt.

Jóna

2009-03-21T18:27:00.007Z

Núna er ég loksins búinn að eignast litla frænku. Ég er því kominn með hinn mjög vinsæla titil móðurbróðir. Eða einfaldlega onkel, á dönsku. Þegar ég fékk fréttirnar, 17. mars, að litla stelpan væri komin í heiminn, 17 merkur, varð ég afskaplega glaður. Hljóp um leið út í búð og keypti vindil og deildi honum með Olgu, Danna og Elíasi í Kongens Have.

Ég er ekkert smá spenntur fyrir því að heimsækja fjölskylduna á Íslandi. Þannig að Íslendingar geta farið að undirbúa sig fyrir komur mínar, sem verða væntanlega margar á þessu ári. Ég ætla mér nefnilega ekki að vera "Jón frændi, sem býr í Danmörku og þú hefur aldrei séð.." Skilst mér að hún eigi víst þrjá onkel-a, mig og bræður hans Ásbergs. Samkeppnin verður því hörð, sérstaklega þar sem þeir búa á Íslandi, en ég er staðfastur á að verða uppáhalds onkel-inn hennar.

Hún er víst ekki komin með nafn ennþá, en ég er að sjálfsögðu búinn að segja öllum hér að hún muni heita Jóna, í höfuðið á uppáhaldsfrændanum sínum, ef ég fæ einhverju að ráða. En ég efast samt um að ég fái að ráða einhverju í því..

Guns of Nørrebro

2009-03-05T12:09:00.002Z

Ég bý á Blågårdsgade, sem liggur á Nørrebro. Það er, samkvæmt íslenskum fréttum, stríðsástand á Nørrebro. Það er dálítið ýkt.

Af og til eru hinar ýmsu skotárasir, þá oftast aðeins lengra upp Nørrebrogade en þar sem ég bý. Tveir færeyingar voru t.d. svo óheppnir að hjóla hægt niður eina götu, í leit að skemmtistað. Þeir vissu ekki að það er svakalega grunsamlegt, að minnsta kosti hvað varðar götugengin, að hjóla hægt. Það endaði ekki vel fyrir þá færeyinga.

En þetta eru bara fréttir. Ég hef ennþá ekki séð, né heyrt í skotárásum. Geri þannig séð bara ráð fyrir að ef ég held mig við dagsljós og þá minnst skuggalegu skemmtistaði og kaffihús, er ég ekki í neinni hættu sem ég gæti hafa forðast annars. Ef "rokkararnir" ákveða að fara að drulla haglaskotum á vegfarendur um miðjan daginn á Blågårdsplads, fer ég kannski að íhuga að flytja. En þangað til líður mér bara mjög vel á Nørrebro.

Annars unnum við í vinnunni verðlaun fyrir bestu auglýsingu á Zulu Awards. Auglýsinguna getiði séð á heimasíðunni okkar.

KuntzKoppel.dk

2009-02-22T15:41:00.002Z

Jæja, ekkert mikið búið að gerast hér, en ég skellti mér í heimasíðugerð og gerði nýja heimasíðu handa stúdíóinu sem ég vinn hjá. Þar er meðal annars hægt að nálgast nokkur vídjó sem ég hef unnið að síðastliðin ár. Heimasíðuna finnið þið hér.

Víborg

2009-02-02T15:09:00.002Z

Ég kom aftur frá Viborg, á Jótlandi, síðasta Laugardag. Ég og Christian keyrðum í fjóra tíma, allsvakalega þunnir. Í Viborg, mjög lítill bær, er sumsé Animationsskóli og í þessum skóla voru þriðja árs nemarnir að klára lokaverkefnið sitt og fá Bachelor gráðu. Þar af leiðandi var stærðarinnar partí á Föstudeginum. Og ef þið þekkjið mig rétt á ég ekki auðvelt með að sýna ábyrgð og skella mér heim á undan öllum öðrum, bara af því að ég þarf að vakna snemma morguninn eftir.

Þannig að ég var í partíi til kl. 9 um morguninn og keyrði af stað til Köben kl. 12. Sem betur fer þurfti ég ekki að keyra bílinn.

Annars þurfti blessaða myndavélin mín að fara í rugl um leið og ég kem til skólans, þar sem meðal myndefna voru hlutir á borð við risastórt sjóræningjaskip, með litlum stop-motion sjóræningjum, og að sjálfsögðu mini-útgáfa af því skipi fyrir víðskot. Franskur maður var búinn að vera að vinna að þessu skipi síðasta eitt og hálft árið. Vonandi verður hann búinn að þessu fyrir 2011..

Það var annars mjög gott að komast út fyrir Köben, og það líka án þess að borga fyrir far og herbergi. Þurfti á smá sveitalífi að halda.

Óóó, snap!

2009-01-26T14:41:00.003Z

Það eru bara 49 vikur eftir af árinu. Við þurfum að fara að drullast til að gera eitthvað úr árinu 2009. Enn sem komið er hef ég gert lítið annað en að vinna og eyða pening í áfengi. Núna þarf að taka sig á. Á miðvikudaginn fer ég að minnsta kosti út til Jótlands í nokkra daga. Það er þó eitthvað.

Annars er ég búinn að vera lesa fréttir. Þar á meðal þessa hér, um 14 ára strák sem labbaði upp að lögreglustöðinni í Chicago í lögreglubúning og var sendur út að keyra með öðrum lögreglumanni. Og eftir fimm tíma vakt með þeim lögreglumanni föttuðu þeir fyrst að strákurinn var ekki alvöru lögreglumaður. Þessi strákur ætti að fá verðlaun fyrir frammistöðuna.

Það eru bara 12 vikur í að það fari að verða dálítið sumarlegt. Húrra!

Dagur #2 á Nýju Ári

2009-01-02T19:46:00.002Z

Í dag er 2. janúar. Árið er 2009. Velkomin í framtíðina.

Heilt ár er liðið. Eitt atburðarríkt ár. Ég ætlaði að gera fullt, sem ég svo aldrei gerði. Ég ætlaði að verða núdisti. Það heppnaðist aðeins að hluta til, enda var ég alls ekki lítið allsber á síðasta ári. En meðlimur af núdistafélagi Danmerkur varð ég aldrei. Ég ætlaði að ferðast til Japan. Þangað fór ég ekki. Ég ætlaði að skipta um banka en endaði með að vera sáttur við helvítis Sydbank að mestu leiti. Hefði ég farið til Japan væri ég nú búinn að koma út fyrir Evrópu í fyrsta skipti.

En það er svo þunglyndislegt að hugsa um allt sem maður náði ekki að gera. Það er svo lítilvægt miðað við það sem ég náði að gera. Nektarmyndataka í Frímúrarahúsi, drekka bjór á pramma í miðri Kaupmannahöfn, hitta fullt af skemmtilegum og falleg kvenmönnum, hoppa nakinn í Søerne, hætta bæði í tveggja ára sambandi og háskóla á sama tíma, vera nakinn á Íslandsbryggju, búa með 6 norðmönnum í sama húsi, fara í sturtu í bala, sjá nafnið mitt á tjaldinu í kvikmyndahúsi, kaupa gítar, verið óhamingjusamlega ástfanginn (sem var í tísku árið 2008, en verður ekki í tísku 2009) og kenna í gamla skólanum mínum. Svo bara sumt sé nefnt.

Allt í allt var þetta atburðarríkt og geðveikt ár. Og ef það er eitthvað sem ég hef lært af því þá er það að maður veit aldrei hvað gerist og að einn mikilvægasti eiginleiki sem hægt er að hafa er að kunna að láta hluti koma sér á óvart.

Já, og að þynnkudagar geta verið bestu dagarnir. Nú bíð ég spenntur eftir degi #3 á árinu 2009.

í Nótt

2008-12-22T07:12:00.003Z

Ég átti erfitt með að sofna í nótt. Og í þetta skiptið var það ekki útaf vælandi ketti eða Jolle (sambýliskonan mín) sem gleymdi að slökkva á sjónvarpinu.

Kl. 1 um nóttina, þegar ég var loksins sofnaður, byrjar einhver að banka harkalega á hurðina. Þar sem ég kem beinustu leið úr draumalandi er ég frekar lengi að átta mig á aðstæðunumm. Fyrst hélt ég að Jolle væri komin heim dauðadrukkin og sé læst úti. Því næst heyri ég að manneskjan sem er að banka er ekki ein. Nágrannarnir eru líka að mumla eitthvað út á gangi. Ég hugsa, hvað er Jolle að spá að öskra svona um miðjan nótt og vekja alla nágrannana?

Þegar ég svo loksins heyri að þetta er ekki kvenmannsrödd að öskra, heldur karlmannsrödd, byrjar viðkomandi að brjóta upp hurðina. Ég sé að í staðinn fyrir myrkrið, sem nú er ansi eðlilegt kl. 1 að nóttu til, blikka blá ljós fyrir utan gluggann minn. Ég staulast úr rúminu, klæði mig í nærbuxur og hleyp að hurðinni staðráðinn í að stöðva manneskjuna áður en hún brýtur upp hurðina. Þegar ég stend upp finn ég fyrst fyrir brunalyktinni.

Ég hika smá, því það leggst ekki vel í mig að fá hurðina alltíeinu brotna upp og fljúgandi í andlitið á mér, þannig að ég hreyfi mig hægt og rólega upp að hurðinni og banka svo harkalega til að gefa til kynna að það er einhver hinum megin við. Þegar ég opna fæ ég svo þrjú fáranlega björt ljós beint beinustu leið í augun mín. Lögreglan stendur fyrir utan og þrír slökkviliðsmenn hlaupa upp tröppurnar. "Það er kviknað í!" "Við þurfum að fá alla út!" "Ert þú Carl?" Allir eru að öskra eitthvað á mig og ég er nývaknaður og ruglaður. "Nei, ég heiti Jón. Má ég fara í buxur?" Ég fæ að fara í buxur, en í ég flýti mér of mikið og gleymi að fara í jakka.

Þegar ég kem út sé ég eina konu sótsvarta í andlitinu, en allir aðrir eru í ágætu ástandi. Þ.e.a.s. miðað við að flestir voru að vakna. Það varð sem betur fer enginn brunaskaði í öllum öðrum íbúðum en þeirri sem upptökin voru í, á 5. hæð og íbúðinni við hliðina á. Eftir einn og hálfan tíma fengum við svo að fara aftur inn. Þegar ég er kominn inn og laggstur í sófann og búinn að róast aðeins niður bankar einhver á hurðina. Þá kom Jolle loksins heim, allsvakalega drukkin. "Hvað gerðist eiginlega?" "Það kviknaði í." "Vá, ok. Þúst, hér?" "Nei, á 5. hæð." "Ok, góða nótt."

Eitt gat ég þó skemmt mér við. Útaf því að ég hafði gleymt að taka með mér jakka var ég sendur inn í lögreglubíl að halda hitanum. Þar var lögreglutalstöð sem af og til tilkynnti mér hvað var að gerast í bænum. Eitt af tilkynningunum hljómaði svona: "Okkur hafa borist fregnir af þjófnaði. Kíkið eftir rauðum Mercedes Benz. Í bílnum er feit, miðaldra kona og ungur maður. Þar að auki er, í skottinu, jólatréið sem þau stálu."

Ég hló upphótt en enginn annar hló.

Gleðileg Jól

2008-12-19T13:47:00.001Z

2008-12-09T04:23:00.002Z

Æðislegt hvernig myndin af ísbjörninum í þessari færslu breyttist í hálfnakinn karlmann með byssur og Guitar Hero gítara, án þess að ég gerði neitt. Internetið, dömur mínar og herrar.

Hvað er frumefni mánaðarins?

2008-12-09T03:40:00.006Z

Þetta er mynd af mér og Olgu, þegar ég kom heim á föstudagsnótt fyrir rúmri viku síðan. Ég kom heim kl. 8 um morguninn og settist niður í sófa með kebab og ætlaði að horfa á bíómynd þegar alltíeinu hreyfist eitthvað í rúminu mínu. Sambýliskonan mín hafði víst hleypt inn Olgu, sem hafði misskilið fyrri hluta skilaboðs míns um að "hitta mig og svo geturðu bara gist hjá mér." Það er óhætt að segja að ég hafi fengið hjartaáfall, þar sem ég var handviss um að nú lægi einhver róni í rúminu mínu, sem Jolle (sumsé, sambýliskonan) hafði hleypt inn.

Annars er lífið ágætt. Ég keypti mér gítar og hann hljómar geðveikt vel. Þ.e.a.s. þegar einhver annar en ég spilar á hann. Það er lítið að gera í vinnunni eftir að ég kláraði að klippa showreel fyrir stúdíóið.

Ég er farinn að hlakka geðveikt til að koma til Íslands um jólin. Og þá ekki minna að fljúga heim með Olgu, sprellkonunni sjálfri. Ég býst fastlega við að drukkið verði rauðvín í þeirri ferð.

Það er einfaldlega ekki hægt að sofna í þessari íbúð. Annaðhvort hefur Jolle gleymt að slökkva á sjónvarpinu og ég meika ekki að læðast inn og slökkva á því sjálfur af hræðslu við að hún liggji þarna nakin í sófanum. Eða þá er kötturinn sem kann ekki að mjálma eðlilega fyrir utan hurðina mína að mjálma endalaust.

Orð dagsins: Nix
Áhugamál vikunnar: Hin ýmsu áhrif snapsdrykkju
Frumefni mánaðarins: Praseódým (59 - Pr)

Ég er ekki þegar að það á svo við

2008-11-11T12:09:00.004Z

Þetta er afar sniðugt. Skrifar inn texta, eða smellir inn link á bloggið þitt (eða hvað sem er, þannig séð) og forritið býr til orðaský handa þér. Tók víst bara nokkur af nýjustu færslunum hjá mér, en ansi töff pæling samt sem áður.

Fyrir viku síðan endaði ég með að vaka alla nóttina í kollegíu á Gyldenløvesgade. Ég horfði nefninlega á kosningarnar í USA, eins og margir aðrir gerðu væntanlega. Obama vann og tilfinningin var mögnuð. Hver veit hvaða raunveruleg áhrif, ef einhver, þetta hefur á heiminn. En það er eitt ljóst, hann hefur ótrúlega hæfileika til að grípa athygli okkar. Og á jákvæðan hátt, ekki á sama hátt og W. Og það gerir mig vongóðan um að það komi betri hlutir frá Ameríku næstu árin.

Allaveganna, núna fer að styttast í Íslandsferð. Einn og hálfur mánuður, ef ég er að reikna rétt upp í hausnum á mér akkúrat núna. Á Íslandi er mikið af fólki sem ég hlakka til að sjá, en til Íslands koma líka systur mínar. Sérstaklega ætti ég að nefna kasóléttu, elsku litlu systur mína Freyju. Sú staðreynd vekur mikla ánægju frá mér, ekki bara af því að það er æðislegt að systir mín er að eignast barn. Það sem vekur sérstaka ánægju er að ég er að fara að eignast frænku! Lítið barn sem á eftir að líta á mig, hugsa "Hver er þetta?" og ég á eftir að segja "Ég er frændi þinn, Jón." Og frá því augnabliki á ég eftir að kenna henni allt sem ég kann, sem mamma hennar þorir ekki að kenna henni. Og þegar hún er ekki alveg orðin nógu gömul til að drekka, hittir hún Jón frænda sem gefur henni einn lítinn bjór. "Og ekki segja mömmu þinni frá þessu.."

Microsoft og Hommafóbía

2008-10-25T16:26:00.003Z

Jæja, hó hó! Hérna er nýafstaðið verkefni frá stúdíóinu sem ég vinn fyrir.

Þetta er auglýsing fyrir Microsoft Office pakkann, sem ég skannaði/litaði og sá um compositing* fyrir. Mjög áhugavert verkefni, tók ekki langan tíma og það var gaman að segjast hafa unnið fyrir Microsoft.

Hinsvegar ákváð Microsoft að láta eins og fávitar þegar við vorum búin að klára auglýsinguna. Ef þið eruð búin að horfa á þetta, þá tókuð þið kannski eftir einni senu þar sem það virðast vera tvö Word lógó að stunda kynlíf. Þegar framleiðslufyrirtækið sem við unnum með sýndi Microsoft auglýsinguna báðu þau okkur um að censora þessa senu. Við spurðum í kjölfarið Microsoft fólkið afhverju það ætti að censora akkúrat þessa senu og ekki aðra kynlífssenu á milli tveggja mismunandi lógóa. Við spurðum hvort þau hefðu einhverja mjög undarlega, abstrakt fóbíu fyrir samkynhneigð. Þar að auki var þetta þeirra eigin hugmynd. Það þarf einhverja sérstaka snilldargáfu að finnast hugmyndin af tveimur Word-lógóum að stunda kynlíf á tröppum fyrir utan skemmtistað fáranlega góð á pappír, og að finnast það svo einum of hýrt og ekki mönnum sæmandi þegar það er svo teiknað, litað og sýnt á skjá.

Það endaði svo með aðeins styttri senu, og hjörtum eftir á. Svona svo þetta væri ekki of hart. Já, og svo breyttu þeir laginu svo það væri aðeins meira sykursætt.

Hey, já. Svo horfði ég loksins á Iron Man. Frábær afþreying. Downey Jr. er æðislegur.

* Compositor er sá sem setur saman alla mismunandi hluta af senu, þ.á.m bakgrunn, effekta o.s.frv. Í sumum tilvikum er þetta ekki neitt svakalega stór hluti af vinnunni en í þessu tilviki var þetta 2/3 af öllum þeim tíma sem fór í að gera myndina. Allt sem er ekki lógóin, er composit vinna hér. Ljós, kameratúrar, hreyfingar á sápukúlum, speglun í gólfinu, setja saman hóp af fígúrum og fleira.

Heil og sæl

2008-10-24T07:33:00.002Z

Jæja, ég ákvað að skella einni té-skyrtu hugmynd inn á threadless.com fyrir keppnina þeirra undir nafninu threadless loves travel. Skemmtilegt nokk er þessi keppni haldin í samvinnu með Icelandair. Þar af leiðandi er hluti af verðlaununum miðar til Íslands. Allaveganna, ef þið hafið tíma megið þið gjarnan skella ykkur inn og gefa hugmyndinni einkunn. Smellið á myndina hérna fyrir neðan og skapið ykkur notendanafn á síðunni.

Það er ekki mikið að frétta af mér, annars. Ekkert sérstaklega mikið að gera í vinnunni, en ég byrja bráðum að kenna í Borups. Ekki er ennþá búið að skjóta mig á hættulegum götum Nørrebros. Ég keypti húsgögn í herbergið mitt, löngu tímabært. Og ég keypti mér iPod nano, sem er unaðslegt fyrirbæri. Ég kem til Íslands 22. des og ætla að krassa húsið hennar Katrínar og halda partý.

Fjármálaósköp

2008-10-13T12:18:00.002Z

Jæja, núna hafa væntanlega allir hripað niður einhver orð, eða skoðanir, varðandi efnahagshrikalegheitin á Íslandi. Og að sjálfsögðu í restinni af heiminum.

Það eina sem ég hef að segja um þetta er:

Mannanafnanefnd

2008-10-12T17:12:00.003Z

Ég hef aldrei skilið tilganginn með Mannanafnanefnd. Afhverju að setja einhvern hemil á sköpunargáfu foreldra hvað varðar nafnagjöf barna? Er ekki hægt að treysta þeim til þess að gefa börnum sínum falleg nöfn? Og hvernig getur nefnd af einstöku fólki ákveðið hvað er ásættanlegt í landi með 300.000 manneskjum? Þar að auki nefnd sem að kýs að kalla nafnið Bambi ásættanlegt. Get ég þá kallað barnið mitt Dúmbó?

Núna er örugglega mjög gott fyrir Mannanafnanefnd að fara að góðkenna mikið af útlenskuhljómandi nöfnum. Það er víst ekkert gott að vera Íslendingur lengur, eða að vera með nafn sem hljómar íslenskt að uppruna. Þá er Dúmbó heldur ekkert sérstaklega slæmt. Mjög internationalt, jafnvel.

Svo er skemmtilegt þegar fólk er farið að nafngefa börnum sínum frægum nöfnum á borð við Napóleon og Elvis, eða jafnvel Jesús. Ennþá skemmtilegra þegar það er gert í Danmörku. Elvis Hansen, Napóleon Jensen og Jesús Edelbo Pedersen.

Ef ég fæ einhverntímann strák, ætla ég að skíra hann Vífil Skíðdal Jónsson. Þá verður hann kallaður Vi vil skide, Dahl í Danmörku.

DR.DK

2008-10-10T14:53:00.003Z

Jæja, ef þið kíkið yfir á forsíðu dr.dk þá er að sjá ákveðnar breytingar. Þar einna helst, neðst á forsíðunni, myndasögurnar sem unnu keppni þeirra síðastliðið ár. Já, dömur mínar og herrar. Ein sú mest lesna fréttasíða í Danmörku hefur sýnt heimilisfræðina mína á forsíðu sinni.

Það róterar á milli fjórum myndasögum frá öllum þremur vinningshöfum. Í dag er "fulli skápurinn" þarna. Á morgun? Hver veit.

Núna er ég bráðum að fara að demba hrósi yfir hana litlu, krúttlegu Olgu mína.

Baulaðu Búkolla

2008-09-22T08:39:00.002Z

Svakalega er dýraríkið hér í kringum herbergið mitt skrautlegt. Ekki nóg með að kettir kúka út um allt í íbúðina og eru ofurgáfaðir og kveikja á tónlistinni minni. Núna er kominn hundur fyrir utan sem geltir og baular eins og kú. Og alltaf kl. 9 um morguninn.

Heimsókn og Nekt

2008-09-16T22:54:00.006Z

Sæl og blessuð. Þetta er löng færsla um heimsókn, en í lokin er smá nekt. Þannig að veriði þolinmóð.

Ef þið hafið lesið bloggið hans Helga þá vitiði að strákurinn kíkti í heimsókn hér um helgina. Það var afar góð og skemmtileg helgi, þar sem farið var á hina ýmsu bari og jafnvel kíkt í mat í gamla skólanum mínum (nýja skólanum hennar Olgu.) Skemmtilegast var kannski hversu ofurölvi Olga varð á föstudagskvöldinu þar sem hún, á stað sem heitir Hvíta Lambið, ákvað að hella úr blómavasa og byrja að skvetta á alla skólavini sína. Sú hugmynd var ekki vinsæl. Kannski skrifar Olga svo á blogginu sínu um heimferðina það kvöld. Hún var víst mjög skrautleg sú ferð.

Með Helga kom vinkona hans frá skólanum, Hilda frá Hollandi. Áður en við hittum hana tókst mér að ljúga að Olgu að ég hefði séð hana áður og að hún væri í rauninni hestur. Olga komst síðar að því að hún var ekki hestur, heldur ein afar hress stelpa og einnig mjög góð í borðfótbolta. Ég og hún áttum sigur yfir Helga og Daða tvisvar sinnum. Þeim var ekki skemmt.

En nú er Helgi farinn aftur til Svíþjóðar og á meðan hann er að afla sér frægða í því útlenska ríki og Olga er upptekinn við að afla sér vinsælda í sínu margslungna danska skólakerfi verð ég að finna mér eitthvað til að takast á við. Síðastliðna fimm mánuði hefur það verið afar krefjandi verkefni í teiknimyndagerð. Því lauk fyrir tveimur vikum síðan og er það mér mikill léttir. Myndin verður vonandi frumsýnd í nóvember, en hún er blanda af heimildarmynd og teiknimyndum sem sýna ákveðna fortíðarviðburði í lífi manneskjunnar sem myndin fjallar um. Spennandi!

En þá er komið að nekt. Sumir muna eftir ákveðinni myndatöku sem ég tók þátt í. Þar voru menn í kuflum, ásamt konum í frekar lítið af kuflum. Hérna eru svo myndirnar úr því, sem ég var fyrst að taka eftir núna. Nú getum við öll farið í skemmtilegan leik. Hvar er Jón á öllum myndunum? Vísbending: Ég gleymdi að fara í skó á einni myndinni.

Og ef þið getið það, þá getiði líka prófað að leita að Gökhan, Jakob, Steffen og Krøll.

Gefisti upp? Jæja, þá getiði fengið svörin ykkar hér.

Jæja, við erum ekki dáin

2008-09-10T20:14:00.003Z

Enda er fáranlegt að halda að uppátæki vísindamanna í göngunum milli Sviss og Frakklands muni nokkurntíman skapa svarthol, hvað þá eitt sem er nógu sterkt eða stöðugt til að slúga upp jörðina. Ég vildi óska þess að fólk væri í jafnmiklu paník yfir gróðurhúsaáhrifum.. það stafar í það minnsta alvöru hætta af þeim.

Ég er kominn heim. Heim til Danmerkur, sumsé. Allt er eins og það á að vera. Bjórsmökkun á mánudögum, ruslfæði á miðvikudögum yfir Lost-glápi. Þessa helgi verður væntanlega farið í Borups kvöldmat með Olgu og Helga.

Apple hefur tilkynnt, fremur fljótlega, glænýjan iPod nano. Hann sparar pláss með því að snúa 2" skjánum frá þeim gamla lóðrétt. Í staðinn hefur nano'inn fengið lánað snúningsmælinn úr iPod Touch, og þannig getur maður snúið honum á hlið og horft á kvikmynd í víð-formati. Jón langar í.

Ísland, fagra Ísland

2008-08-28T20:38:00.003Z

Jæja, þá er kallinn mættur til heimalandsins. Og kannski alveg við hæfi að mæta þegar Íslendingar eru stoltastir. Daginn eftir að ég lenti, lentu sumsé, eins og allir vita, silfurstrákarnir. Ég fór að sjálfsögðu út á Arnarhól og tók á móti þeim. Súrrealístisk stemning hófst með Páli Óskari að reyna að troða öllum hitturum sínum inn í athöfnina, með afsökunum á borð við "Ég er viss um að strákarnir okkar hugsuðu allan tímann um ást, þegar þeir kepptu á móti Spánverjum" og söng síðan eitthvað af sínum mörgu lögum um ást. Laddi kom inn og tók einhvern sketch og tæknimaður og sjúkranuddari landsliðsins var fagnað af nánast jafnmiklum krafti og Ólafur Stefáns. En þetta var alveg mjög gott stuð og ég er að sjálfsögðu mjög stoltur yfir frammistöðu liðsins.

En núna veit ég ekkert hvað ég á að gera. Allir eru svo uppteknir að ég sit mestallan tímann bara heima og hlusta á Best of Chuck Berry diskinn hans pabba.

Annars er í fréttum að ég tók á móti Helga Rafni á Lúfthöfninni í Köben síðasta Sunnudag. Við keyrðum með lest til Lund að hitta Torbjorn og Hrafnhildi sem ætluðu að skaffa þak yfir höfuð Helga næsta hálfa árið. Kallinn er meira að segja búinn að stifta nýtt blogg sér fyrir Svíþjóðar skandala sína.

Núna ætla ég bara að vona að Egill sé laus svo við getum skellt okkur niður í bæinn í einn bjór eða tvo. Ef þið eruð að lesa þetta blogg frá Íslandi, og eruð ekki með nýja númerið mitt, þá er það 867-0121.

Little Miss Flaming Sunshine Lips

2008-08-09T14:27:00.003Z

Ég fór á Flaming Lips tónleika í gær. Jakob hafði kynnt fyrir mér sýningahæfileikum þeirra á DVD diski með tónleikum þeirra í Óklahóma, heimabæ þeirra. Ég var ekki að búast við svipuðu showi í gær, þar sem tónleikarnir voru haldnir í Tivoli í Köben. En sannleikurinn var sá að þetta var með bestu upplifunum lífs míns. Það er ekki hægt að lýsa þessari magísku upplifun í orðum, þegar þú lítur upp í himininn og sérð konfettí rigninguna velta yfir þig úr hinum ýmsu fallbyssum af sviðinu í byrjun viðlags Do You Realize??. Það voru svo margir hápunktar að ég get ekki ákveðið mig hver var sterkari.

Fyrir 85 kr danskar, er ekki hægt að kvarta yfir neinu á þessum tónleikum.

Ég keypti Little Miss Sunshine á DVD um daginn. Var að horfa á hana í dag. Hún er alveg jafn skemmtileg, falleg og fín og ég mundi eftir. Ef einhver er ekki búinn að sjá þessa mynd, þá er hún skylduáhorf næst þegar þið leigið ykkur DVD.

Þáttaröð vikunnar: Hin vanmetna, sem náði ekki lengra en eina seríu á meðan rusl eins og King of Queens er í tíundu seríu, Studio 60 on the Sunset Strip.

Fatlaður

2008-08-08T08:43:00.002Z

Um daginn tókst mér, með miklum tilþrifum, að rífa handlegginn minn úr lið. Með því að hoppa í vatn.

Ég lenti ekki á neinu, ég var ekki bundinn við bakkann eða eitthvað þvíumlíkt. Ég hoppaði bara á vatnið. Það er víst ekki alveg hættulaust að stinga sér í vatn á Islands Brygge, eins og ég hef alltaf haldið fram. Ekki ef þú ert óendanlega óheppinn. Við stunguna flýgur vinstri höndin mín aðeins til hliðar áður en ég kem í vatnið. Allur líkaminn minn flýgur því í gegnum vatnið, eins og venjulega, fyrir utan vinstri höndina. Ég kem upp á yfirborðið öskrandi, nakinn og með höndina gjörsamlega óhreyfanlega.

Þar sem ég er með ónýta handlegg get ég ekki komið mér upp úr vatninu þannig að ég, eins og hinn mesti Rambo eða Martin Riggs, fer upp að stiganum og kippi sjálfur handleggnum í lið.

Ég fór til læknisins viku eftir, til að athuga hvort að allt væri í lagi og allt var í góðu. Engin brot, engin slitin liðabönd og í rauninni fór ég ekki alveg úr lið. Ég reyni að forðast að segja þann hluta sögunnar, því það er ekki eins svalt að fara næstum því úr lið, en ég verð nú að vera hreinskilin við ykkur. Eitthvað hreyfðist til, því ég ýtti klárlega einhverju aftur þar sem það átti að vera. En ég er ekki ennþá kominn í hóp þeirra sem hafa farið úr lið og því bara upplifað hluta af sársauka þeirra.

Hinsvegar, er ég kominn í hóp þeirra sem eiga auðveldara með að fara úr lið. Sem er ömurlegt. Og ég þurfti að vera með fatla í viku. Sem er líka ömurlegt, nema þegar maður notar það sem conversation starter við stelpur.

Ég er búinn að fá nóg af kattarskít

2008-07-18T17:47:00.002Z

Ef ég sé enn einn kattakúkinn fyrir utan hurðina mína fer ég og myrði þessa tvo ketti. Þetta eru alveg fáranlegustu kettir sem ég hef nokkurntímann deilt íbúð með. Einn þeirra kúkar út um allt, og alltaf annaðhvort rétt fyrir framan klósettið sitt, eða í rúmið mitt.

Og hinn kötturinn er bara skrítinn. T.d. núna labbaði hún inn í herbergið mitt og kveikti á tölvunni minni og setti tónlist í gang. Ég er pínu hræddur við þann kött.

"One, two, three.. " - "Wait, wait.. one, two, three and then go?"

2008-07-05T14:00:00.006Z

Lethal Weapon serían er afskaplega merkilegt fyrirbæri. Allir þekkja myndirnar, en þegar ég hugsa út í það man ég aldrei hvað gerist í hvaða mynd. Ég man eftir svona.. hvað á maður að kalla það? Hápunktarnir í seríunni. En ég man aldrei í hvaða mynd þeir birtast.

Þannig að ég ákvað að horfa á alla seríuna. Ég byrjaði á númer tvö. Af því að ég hélt að númer eitt væri sú sem að ég mundi best eftir, og að ég hefði aldrei séð númer tvö.

Lethal Weapon 2

Einu sinni voru hryðjuverkamenn ekki búnir að ráðast á Bandaríkin og þá þurftu handritshöfundar að vera aðeins hugmyndaríkari hvað varðar vondu kallana í hasarmyndum. Skúrkarnir í Lethal Weapon 2 er National Party diplómati frá Suður Afríku og fylgismenn hans, sem í byrjun myndarinnar eru að smygla peningum. Mitt í öllu þessu mótmælir fólk hart fyrir utan skriftofu diplómatans gegn kúgun þeirra á Suður Afrísku fólki. Þetta setur mjög góðan tímaramma á myndina, auk þess að vera ansi frumlegt. Lethal Weapon 2 er þess vegna komin á gott ról alveg frá byrjun.

Jæja, þá er bara að fara í aðalatriðin. The good stuff. Það sem gerir Lethal Weapon að Lethal Weapon.

Myndin byrjar á því að Riggs og Murtaugh gera eitthvað fáranlegt og sprengja upp hluti: Já
Fylgismaður drepinn af höfuðskúrki í byrjun myndar: Já
Roger Murtaugh missir sig yfir einhverju varðandi elstu dóttur sína: Já
Martin Riggs hittir hina einu sönnu: Já
Riggs fer úr lið: Já
Murtaugh sér eftir því að hafa gert eitthvað: Já
Riggs eyðileggur bílinn hans Murtaugh: Já
Riggs gerir grín að Murtaugh á löggustöðinni: Já

8 af 8. Mjög gott. Klárlega eðal Lethal Weapon fílingur á ferð þarna.

Hápunktar myndarinnar: Klósettsprengjan, Kynlíf, Þyrluárás á hjólhýsið, Van Den Hagendaas drukknar, Húsið á stólpunum.

Já, og þetta, sem er mögulega besta atriðið í allri seríunni:

Multiplayer Snake

2008-07-02T12:52:00.004Z

Hér er nýjasta tilraunin í tölvuleikjasköpun. Multiplayer Snake spil, fyrir upp til fjóra leikmenn. Endilega prófið þetta, og ef þið eruð eitthvað "Pff.. þetta er bara Snake," þá vitið þið klárlega ekki hvað það er motherf#%*!*ing erfitt að kóða multiplayer spil..

Rannsókn #1

2008-06-23T13:59:00.004Z

Hversu illa lítur Jón út, miðað við tíma dags

Tilgangur þessarar rannsóknar var að athuga áhrif næturlífs á útlitslegt ástand Jóns. Tilraunin var framkvæmd um helgina og eru niðurstöðurnar mældar með spegli.

Eins og sjá má á grafinu hér til hliðar er morguninn allra verstur fyrir Jón. 9:00, ef hann er heppinn, fer hann á fætur. Lélegt útlitsástand er í hámarki, eða 10 iú (illa-útlits einingar) En ef vel var tekið á því kvöldið áður versnar útlitið um leið og hann stendur upp og kíkir í spegil, eins og hægt er að sjá á grafinu (kl. u.þ.b. 9:05) þar sem hann skríður rétt yfir 10 iú. Hann hefur það að vana að smyrja sig með húðkremi, ásamt þess að fara í sturtu til að milda áhrif gríðarlegrar iú myndun.

Þegar líður á daginn fara áhrifin hinsvegar hægt og rólega að minnka. Hann lítur ennþá mjög illa út í kringum hádegi og fram að u.þ.b kvöldmatarleyti. Þá er húðin búin að losa sig við stórt magn af iú-um, verður minna bólgin og rauðir blettir fara að hverfa. Kl. 0:00 hefst svo óhófleg drykkja, iú myndun brýtur öll met, Jón gleymir að smyrja sig með kremi áður en hann fer að sofa og grafið endurtekur sig, með sömu niðurstöðum næsta dag. Það hefur gert hið sama eins lengi og við höfum rannsakað manninn.

Dr. F. Bitschauser

Fullorðinn

2008-06-17T17:50:00.003Z

Hvernig skilgreinir maður að vera fullorðinn?

Einu sinni voru það foreldrar mínir. Einu sinni voru það systkini mín. Núna? Ég hef ekki hugmynd.

Er einhver fullorðinn? Er maður fullorðinn þegar maður á efni á bíl, mat fyrir börnin og internetreikningnum? Er maður fullorðinn ef maður hættir að fara á "djammið" Er maður fullorðinn þegar maður hættir að sletta enskum orðum? Er maður fullorðinn þegar maður stundar reglulegt kynlíf? Er maður fullorðinn þegar maður hættir að fíla Dumb & Dumber?

Eða er maður fullorðinn þegar maður myndar sínar eigin skoðanir á hinum ýmsu lífs spurningum?

Kannski eru fullorðnar manneskjur ekki til.

Spurning dagsins: Svartur og hvítur klæðnaður? Í hvíta eða litaða þvottinn?
Kannski er maður fullorðinn þegar maður veit svarið við þeirri spurningu.

Den Gamle

2008-06-16T12:52:00.004Z

Gökhan, góður vinur minn í Kaupmannahöfn, vaknaði í dag við afar skrítin skilaboð.

Ég gat ekki sofnað í nótt, þannig að ég spilaði tónlist í tölvunni minni til að yfirgnæfa dósahláturinn í sitcom þættinum sem leigjandinn minn var að horfa á. Eftir smá stund virtist ég vera að fara að sofna. En þá hringir síminn. "Þú verður að koma út!" Ég hleyp út á eftir, augljóslega góðkunnum, manninum í símanum. Hann tilkynnir mér að til að bjarga mér, öllum vinum mínum og minni heittelskuðu, þyrfti ég að mynda tengsl við erkióvin hans. Til að gera það þyrfti ég að sannfæra hann í gegnum símann minn að ég væri að vinna undir sama gengi og hann. Þar sem hann var danskur, og ég þyrfti að virka sannfærandi, ákvað ég að sjálfsögðu bara að senda SMS skilaboð. "Hver er þetta?" spyr hann. "Fyrir hvern vinnurðu?"

Ég skrifa, "Sjovt nok, så arbejder jeg for den gamle." og sendi honum skilaboðin. Síðan keyrir bíll yfir mig og ég vakna á spítala, þar sem ást lífs míns stendur yfir mér og tilkynnir mér hversu miklar áhyggjur hún hafði af mér. Við kyssumst, og Steffen og Tara, sem fylgjast með þessu fyrir utan herbergið segja við hvort annað "Þetta er alvöru ást."

Síðan vakna ég, í dag, í rúminu mínu, óbrotinn. Og fæ SMS skilaboð frá Gökhan:

"Den gamle?"

Heimilisfræði

2008-06-13T08:24:00.002Z

Ef þið voruð ekki búin að taka eftir því, þá er ég búinn að laga aðeins til í Heimilisfræði heimasíðunni. Fleiri fítúsar, þar á meðal RSS feed (ef þið vitið eitthvað um það) og kómhendingar á hverri myndasögu. Ekki alveg eins einfalt lúkk og var áður fyrr (en það gæti breyst næstu dagana, að einhverju leiti) en mjög fínt, að mínu mati.

Þar að auki eru komnar tvær nýjar myndasögur í dag og í síðustu viku. Kíkið á þetta, og endilega hripið niður kómhendingar á sjálfri síðunni.

Casimir

2008-05-29T19:52:00.009Z

Ég ætla að skrifa þetta, ekki af því að ég held að ykkur eigi eftir að finnast þetta sérstaklega áhugavert, en meira bara þannig að eftir t.d. 7 ár þegar ég er orðinn þrítugur get ég litið til baka og lesið þessa bloggfærslu og hugsað "Já, ok.. ég var nú ekkert svo fáfróður þegar ég var lítill."

Eitt af uppáhaldsáföngum mínum í menntaskóla var klárlega Eðlisfræði. Þess vegna fannst mér afar áhugavert að rekast á grein um vísindafræðilegt hugtak sem ber nafnið Casimir effect. Það lýsir sér í því að þegar tvær afhlaðnar (sumsé ekki segulmagnaðar) málmplötur eru lagðar mjög nálægt hvort öðru í algjöru tómarúmi myndast kraftur á milli þeirra sem ýtir þeim saman.

Samkvæmt hefðbundri Eðlisfræði getur þetta ekki gerst í tómarúmi. Í algjöru tómarúmi eru engar öreindir, þar af leiðandi ekkert til að mynda kraft sem myndi ýta plötunum. Til að útskýra þetta verðun við því að snúa okkur að áhugaverðasta sviði Eðlisfræðinnar.

Quantum Physics. Eða skammtafræði, á íslensku ef ég man rétt, sem fjallar (í mjög stuttu máli sagt) um hvernig heimurinn eins og við sjáum hann er miklu flóknari þegar þú lítur alla leið niður í minnstu einingar. Þar er hægt að útskýra Casimir áhrifin með fyrirbæri sem kallast Sýndareindir (Virtual Particles.) Það eru eindir sem myndast og eyðast jafnóðum, og þær eru meðal annars mögulega útskýring á hvernig heimurinn gæti hafa myndast eðlilega, frá engu.

En við myndum ekki finna fyrir þeim í tómarúmi vegna þess að krafturinn sem þær mynda er dreift gífurlega jafnt. En þegar málmplöturnar eru svona nálægt hvor annarri er ekki nóg pláss á milli þeirra til að mynda sama kraft á milli þeirra og þann sem myndast á ytri hlið málmplatnanna.

Þar af leiðandi ýtir stærri krafturinn plötunum saman.

Ég veit ekki með ykkur, en mér finnst alltaf áhugavert að fullvissa mig af og til um þá staðreynd að það sé alltaf hægt að afsanna og sanna nýja hluti. Og að mín kynslóð gæti mögulega upplifað sögulegar uppgötvanir, sem kannski kollvelta öllum þeim pælingum sem við tökum venjulega sem gefið.

Athugasemd: Svona, bara.. til vonar og vara. Eins og venjulega, þá er ég bara að endurtaka hluti sem ég hef lesið, og mjög líklega lesið vitlaust. Þannig að ef einhver rosalega fróður mætir hingað og les þetta, og hneyklast máttu endilega leiðrétta mig í kómhendingunum.

Heyrðu, bíddu..

2008-05-27T20:49:00.000Z

Hvað er þetta? Ný Heimilisfræðismyndasaga?! Vá..

Vangaveltur

2008-05-27T17:49:00.003Z

Afhverju segjum við eiginlega SMS? "Hey, fékkstu SMS'ið mitt?" "Ég sendi honum bara SMS."

Ég... sendi honum stutt skilaboða kerfi?

Halló Ísland

2008-05-27T17:17:00.003Z

Hæ íslenskt fólk,

Eftir heimsóknir frá foreldrum, heimsókn til systur, símtöl/SMS við aðra systur, bloggið hennar Olgu, heimsóknir til frændfólks og Benedikt Gröndal hefur mér tekist að púsla saman hvað er að gerast á Íslandi.

Og því datt mér í hug að það væri viðeigandi að hripa niður fáfróðar skoðanir mínar á hinum ýmsu málum. Þar á meðal ótrúlega málefnanleg umfjöllun mín um íslensku krónuna, neðst í færslunni.

Ástin er diskó, lífið er pönk
Ég hef ekki séð þetta leikrit, en mér skilst að það sé ekkert sérstaklega gott. Ég get heldur ekki ímyndað mér að það sé neitt sérstaklega gott. En hey, þúst.. Sveppi er í því!

Hannes Hólmstein
Burtséð frá því að hann framdi glæp og burtséð frá því að af einhverri ótrúlegri fávisku er fólk að borga skuldir hans fyrir hann. Það sem mér finnst allfáranlegast er að hann hélt að hann gæti stolið frá Halldóri Laxness án þess að fólk tæki eftir því?

Vörubílstjórar
Vörubílstjórar, Lögreglumenn og Dimmiterandi Nazistar. Svona hljómaði sagan um mótmæli vörubílstjóra, í gegnum Benna og ég er eiginlega leiður yfir því að hafa misst af því.
En ég meina, þið hefðuð átt að sjá hvernig fór þegar einn hundur var skotinn út í Christianíu, af lögreglumanni. Það var eins og það hefði farið fellibylur yfir göturnar á milli Christianíu og Christianshavn.
Og þá er ég að tala um atburð þar sem fólk á rétt á að ybba sig. Stundum þarf ekki meira en ungt fólk að partýa út á götunum án þess að strætóar og verslanir eru lögð í rúst, og jafnvel 7-Eleven lokar.
Ha... já. Allaveganna, bara fínt hjá vörubílstjórum að stoppa umferð smá. Gott fyrir umhverfið. Fáranlegt af lögreglunni að ráðast svona á þetta yndislega lið.
Já, og hverjum langar ekki rosalega að finna þessi 1%, sem sögðu samkvæmt könnun Gallup að þeir vildu að skattlagningar á eldsneyti væru hærri, og gefa þeim.. knús.

Krónan
Djöfull er ég ánægður að ég er ekki með tekjur í henni.

Gleði

2008-04-23T10:58:00.003Z

Jæja, elsku áhangendur og tilfeldir gestir Vefseturs Stóra Jóns.

Nú hef ég góðar fréttir að færa. Jón, semsagt ég, er nefninlega fluttur í herbergi sem liggur akkúrat fyrir ofan Kalaset, eða eins og ég kýs að kalla það Where Everybody Knows My Name. Það þýðir að ég bý núna 5 mínútur frá Nørreport. 3 mínútur frá Vatninu sem liggur á milli Nørrebro og miðbæjarins. 1 til 15 mínútur frá öllu skemmtanalífi.

0 mínútur frá hamingju!

Þetta er ég akkúrat núna.

NFMH.is

2008-04-10T17:44:00.003Z

Fyrir svona einu og hálfu ári síðan skrifaði ég um hið hrikalega sjón- og vefmengun sem var NFMH.is.

Þess vegna finnst mér við hæfi að hrósa núverandi vefráði fyrir afbragðs nemendasíðu. Fíla nýja Skaramúss formattið í botn og líst vel á módern look.

Vel af sér vikið, vefráðsfólk.

Leiðrétting: Vefnefndarfólk.. Afhverju nafnbreyting?

Hullo!

2008-04-10T16:24:00.006Z

Blésuð öll sömul.

Síðasta þriðjudag mætti ég heim til Köben, eftir fjögurra daga ferðalag til Brighton & Hove að heimsækja systur mína, skoða hvolp, drekka bjór með Luis, borða sjávarrétti og labba um í Arundel. Mjög ánægjuleg ferð.

Ég ákvað að taka þessu bara rólega. Skoðaði sentrúm í Brighton, heimsótti Mio Minn, búðina hennar Freyju, og á Laugardeginum fóru ég og Luis, sem var í heimsókn hjá bróður sínum í Brighton, á pöbbarölt og urðum alveg vel góðir í glasinu. Á tímabili gat ég ekki lengur opnað hurðir, og stoppaði fyrir framan hurðina á The Wick Inn og horfði örvæntingafullur á dyravörðinn fyrir utan. Að lokum kom Luis og sýndi mér hvernig maður getur, merkilegt nokk, bara ýtt á hurðina til að opna.

Kvöldið endaði samt frekar fljótt þar sem Luis ákvað að reykja jónu, og fáum mínutum seinna sagði hann "Jon.. Hjem. Nu." og labbaði af stað án mín. Þar sem hann gisti heima hjá systur minni þetta kvöld varð ég að elta hann. Svo át hann þrjá kebab á leiðinni heim.

En helgina á undan fóru ég og Steffen á mjög impúlsíva ferð til Osló, Noregi. Leiðinni var haldið í partý hjá systur hans, þar sem ég skipti frá dönsku yfir í íslensku og svo að lokum í norsku. Skemmtilegt nokk nefninlega höfðu helmingurinn af Norðmönnunum búið á Íslandi og gátu talað svona skemmtilega bjagaða íslensku. Góðar fréttir fyrir mig, þar sem ég tala líka bjagaða íslensku. En ég held ég fortrekki (dönskuslettur eru inn) að tala bara eitt tungumál þegar ég er fullur. Tvö tungumál í einu er nógu ruglandi..

Markmið ársins:

Hvað er að frétta?

2008-03-13T22:10:00.003Z

Ef þið ætlið að skrifa eitthvað í kómhendingarnar megið þið gjarnan segja mér hvað er að frétta af ykkur. Finnst ég vera svo útilokaður frá öllu íslensku hér upp á síðkastið.

Það sem er að frétta af mér er að ég fór á stefnumót um daginn. Það gekk mjög vel, þangað til að ég stóð fyrir utan íbúðina hennar. Mér var allsvakalega mál að míga, þannig að ég spurði hvort ég mætti ekki nota salernið hjá henni. Það var að sjálfsögðu allt í góðu. Síðan tók við gangurinn upp að, því sem virtist vera, hæð nr. 100. Ég hélt kúlinu alla leiðina upp, þar til ég lokaði klósettishurðinni og sprengdi upp buxnaklaufinni minni og rétt náði að beina sprellaranum í áttina að klósettinu.

Ahh, tilfinningin var góð. Alveg þar til ég leit niður og sá að ég hafði skilið eftir dulítinn þvagblett neðarlega á hægri hlið buxna minna. Mjög áberandi blett. Ég reyndi allt, frá að þurrka buxurnar með pappír til að væta þær aðeins í kringum blettina þannig að þær virkuðu eins og þessar nýju tískubuxur sem koma út úr verksmiðjunni með bletti. Ekkert virkaði.

Til að vekja ekki of mikla athygli að því hversu lengi ég hafði verið á salerninu ákvað ég að það væri tímabært að koma út með skammarsvip. En þá fann ég lausnina. Ég labbaði sallarólegur út, og hrifsaði í stúlkuna og skellti rembingskoss á hana. Hún hafði engan tíma til að líta niður, og þegar langa kossinum var lokið, stillti ég mér upp að dyrarkarminum, hallaði mér að honum með vinstri fótinn fyrir framan þann hægri og þakkaði fyrir ánægjulegt kvöld.

Þannig að þvagbletturinn olli því að ég endaði stefnumótið með meiri stæl en ég hefði líklegast gert og við ætlum að hittast aftur.

P.S. Katrín, þú getur séð e-mailið mitt á Facebook, kjáninn þinn.

Jagtvej 69

2008-03-02T14:41:00.002Z

Jæja, núna er ég offisjalt orðinn Ungdomshus styðjandi. Og algjörlega af tilviljun.

Á leiðinni í partí í gær, þurfti ég að fara í hraðbanka þannig að vinkonur mínar tóku leigubíl í partíið og ég ákvað að labba þangað. En þegar ég var kominn í nágrennið mundi ég að ég hafði ekki hugmynd um staðsetningu partísins. Ég keypti því inneign og reyndi, árangurslaust, að skeita meiri inneign á símann minn. Eftir fleiri tilraunir ákvað ég að gefast upp og settist við bál.

Þetta bál lá á Jagtvej 69, og í kringum það bál voru allmargir reiðir unglingar og lögregluflokkur með grímur. Ég sat þarna og dáðist að kaósinu, ungir menn hoppuðu út á göturnar og spiluðu fótbolta bara til að vekja andstyggð lögreglunnar og svartklætt lögreglufólk stóð út um allt og öskraði á strákana sem gaf þeim eitt stykki fingur. Ég lenti sjálfur ekki í neinu verra en að vera stoppaður þegar ég ætlaði yfir götuna. "Hey! Hvert ertu að fara?!" "Bara yfir götuna." "Já... ok. Passaðu þig á bílunum."

Mér fannst það mjög áhugavert að upplifa þessa stemmningu sem ég hef fyrr einungis séð í sjónvarpinu. Maður skilur báðar hliðar í málinu þegar maður getur séð þetta með eigin augum. Lögreglan gerir margt sem telst yfir strikið, en undir þessu ótrúlega, stanslausa áreiti get ég vel skilið að ekki allt fer eins og maður hefði viljað.

Kalaset og rafmagn

2008-02-28T15:08:00.002Z

Ég sit núna á Kalaset (það sem ég kys að kalla mitt Cheers) og spila Backgammon með Steffen.

Ástæðurnar fyrir því að við erum hér, en ekki bara heima eru tvær.

#1, Því það er sólskin í dag, og á morgun er pottþétt ekki sólskin. Þannig að maður verður að fara út þegar það kemur sólskin. Það er regla.

#2, Af því að það er ekkert internet heima. Ástæðan fyrir því er sú að allir reikningar í Amagerhúsinu "hverfa" á mjög mystískan hátt. Það veldur mörgum vandræðalegum aðstæðum, af og til.

Síðasta þriðjudagin, t.d., vaknaði ég þegar tveir menn frá Dong Energy bönkuðu á hurðina mína og Steffens (hurðin í herberginu okkar liggur út í garð.) Við vorum báðir steinsofandi, en ég stóð upp og opnaði hurðina, á nærbrókunum. Mennirnir tveir sögðu mér að við þyrftum að borga rafmagnsreikninginn okkar núna, eða þeir myndu loka fyrir rafmagnið. Steffen, ennþá hálf sofandi, spurði hvað reikningurinn væri hár.

12.000 danskar krónur. Þá hófst einn stór farsi þar sem ég og Steffen hlupum um allt húsið og vöktum alla sem voru heima, og sendum fólk af stað í hraðbanka. Á meðan allir voru í hraðbanka hjálpaði ég mönnunum að leita að mælinum, sem ég hafði ekki hugmynd um hvar var staðsettur.

Eftir langa leit, fundum við mælinn og allir stóðu með peninga, samtals ca. 9000 kr og ein á leiðinni í hraðbanka eftir restinni, þegar einn mannanna segir "Hey, slappiði af. Við lásum mælinn og þið þurfið bara að borga 1.700 krónur."

Ég sá að Steffen fékk næstum því hjartaáfall, en ekki eins og hann hefði fengið bestu fréttir í heimi, eins og þetta voru. "17.000 krónur?!"

"Nei, Steffen. Uss, borgaðu þeim 1.700 núna, áður en þeir skipta um skoðun!"

Við borguðum og þeir fóru, og við þökkuðum þeim fyrir að vekja okkur svona vinalega.

Hvað maður á ekki að gera í Köben #1

2008-02-23T20:02:00.003Z

Ekki stofna reikning hjá Sydbank.

Ég fékk vinnu í skólanum mínum og þurfti að opna reikning eins fljótt og mögulegt var. Þannig að ég spurði hvaða banki væri nálægst skólanum (á þessu tímabili var skólinn nánast heimilið mitt.) Sydbank var víst rétt hjá.

Ég fór þangað og sagði á minni bestu dönsku "Jeg vil gerne få sådan et konto hos jer."

"Hvabehar?!" sagði konan. "J..j..jeg vil gerne åbne et konto. Kan jeg det?"

Já, það gat ég. En fyrst þurfti ég að sýna henni einhverskonar skilríki. Ég sýndi henni ökukortið (rétt orð?) mitt, en það varð að vera mynd. Æji, þá kem ég aftur með myndaskilríki. Daginn eftir kem ég með myndaskilríkið mitt frá Landsbanka. En nei, ég mátti ekki koma með íslensk skilríki, því það er ekki hægt að athuga hvort að þetta sé alvöru kort. Í guðanna bænum! Þá kom ég með passann minn daginn eftir og hún tók við honum. Ég fagnaði. Ég var kominn með reikning.

En kortið sem ég fékk frá þeim virkar bara í hraðbönkum frá þeim, og tveimur öðrum bönkum. Og enginn af þeim liggur nálægt neinu. Ég hef séð tvo Sydbank hraðbanka í Köben. Sydbank er líklegast ekki einu sinni alvöru banki. Þannig að í hvert skipti sem ég á takmarkaðan pening í vösunum og er heima, get ég ekki bara hoppað út í næsta banka og náð í meiri pening. Ég þarf að fara alla leið niður í bæ og til baka.

Og starfsfólkið er með eitthvað autoritets brjálæði; öllum reglum skal fylgja. Ég ákvað að opna netbankann minn, og hún bað mig um að skrifa undir. Ég tók ekki eftir því, en þegar ég byrjaði að skrifa, hrifsaði hún kortið mitt. Ég skrifa undir og læt hana fá blaðið. "Nej! Det er ikke din signatur." Ha? Hvað meinarðu? Já, vá. Þetta var semsagt ekki eins og undirskriftin á kortinu sem hún hrifsaði áður. Hún neitar að gefa mér kortið og segir mér að reyna aftur. Alltíeinu man ég að ég vandaði mig rosalega við að skrifa á kortið mitt þegar ég fékk það, þannig að ég prófa að skrifa JON K. eins fínt og ég gat. "Nej, det er stadigvæk ikke rigtigt." Hvað ertu að tala um kelling?! Gefðu mér netbanka, andskoti!

Ég skrifaði JON K., og grátbað hana um að opna þennan bévítans netbanka. Við ræddum það fram og til baka þangað til að ég sagði "Kan du ikke bare fortælle mig hvad det er der er forkert, er det fordi der mangler et K til, eller hvad?!" og skrifaði JON K.K.

Hún lagði kortið frá sér og sagði "Tak. Netbanken er åben om cirka to dage. Ha' en god dag."

Ég horfði, með undrunarsvip, á hana, tók kortið mitt og labbaði út án þess að segja nokkurn skapaðan hlut.

Svipaðir hlutir gerast í hvert skipti sem ég kem þangað. Um daginn lenti ég á einni frekar leiðinilegri kvinde, sem sagði, mjög kaldhæðnislega við mig "Ha' en god dag." Og um leið og hún kláraði setninguna heyrði ég þrumum fyrir utan og það dembdi niður rigningu. Það var pottþétt henni að kenna.

Ég er ennþá með þetta asnalega kort sem ekki er hægt að nota, og netbankinn þeirra er mesta drasl í heimi. Og mér hefur enn ekki dottið í hug að skipta um banka.

Fyllri, Fyllst

2008-02-23T18:51:00.004Z

Fyrst og fremst vil ég biðja þá sem geta að fara hingað og digga vídjóið. Teiknimyndin mín er nefninlega komin á Featured lista á YouTube, og er þess vegna að fá smá athygli þar. Þar á meðal eru kómhendingar á borð við "Its horrible, TERRIBLE, GOD AWFUL, GO TO HELL COCKSUCKING GAY HUMAN RIGHTS PROMOTING, LESBIAN, ANAL SEX WITH OTHER GUYS HAVING, DILDO SELLING, DEVIL WORSHIPPING, BIGOT!!!"

En hin 300 hafa margt gott að segja um myndina og ég er afskaplega ánægður að litla teiknimyndin mín hefur fengið athyglina sem hún átti skilið.

Maður er oft fullur og af og til finnst manni maður vera einum of fullur. Á sumum sést það, vinkona mín talar t.d. alveg rosalega hátt þegar hún er full. Á Steffen sést það í augunum. En þegar þú heldur að þú sért orðinn aðeins of fullur þá sérðu alltaf einhvern sem er miklu fyllri en þú. Um daginn, úti á mjög ánægjulegum bar, sá ég stelpu sem gat ekki staðið í lappirnar. Eftir að hafa bent og hlegið smá að henni, með vinunum, kom hún svo og settist hliðina á mér og vinkonu minni.

"Er... þetta mmm-kærastan þín..?" "Eh, nei. Þetta er vinkona mín." (Hér hefði ég klárlega átt að segja já.)

"Ætlarðu.. hérna.. í sleik við hana?" "Veistu, ég var að spá í ekki að gera það. En farð þú bara í sleik við hana." (Ekki sniðugt, því þegar ég sagði þetta greip hún í brjóst vinkonu minnar.)

"Ef þú ferð ekki í sleik við hana, þá skaltu fara í sleik við mig!" (Ég veit að maður segir ekki skaltu á íslensku, en hún var líka dönsk og talaði dönsku..)
"Já, hey! Ok, skemmtilegt dílemma sem þú ert búinn að setja mig í," segi ég. Hún skildi mig ekki alveg. Hún hélt áfram að spyrja mig. Að lokum sagði ég "Nei, veistu. Ég er hommi. Ég er faktísk að reyna við gaurinn þarna" og benti á einhvern strák sem sat fyrir framan mig. Núna sá ég eftir að hafa ekki sagt já við kærustu spurningunni.

"Nei, nei.. ekki.. ó, djöfull," segi ég í tilraun til að stöðva hana. Hún ákvað nefninlega að hjálpa mér með strákaleitina mína. Hún öskrar á gaurinn, og signalerar að ég vilji fá athygli frá honum. Ég kíki á hann og brosi. Ég útskýrði aðstæðurnar fyrir gaurnum og hann hló, en ég held samt að hann haldi að ég hafi samt verið hommi.

Stelpan slúttaði þessu afbragðskvöldi svo með að detta og fella borð með fullt af glösum. Henni var hent út.

Sagnir af Danmerku

2008-02-15T17:19:00.003Z

Um daginn sagði Steffen við okkur strákana (á dönsku, eða eiginlega norsku) "Hey, viljiði vera statistar í ljósmyndatöku kærasta systur minnar?" Við sögðum allir "Já, það væri nú örugglega bara gaman." En þá sagði Steffen "Þemað er Eyes Wide Shut og það verða naktar dömur með."

Þá sögðum við "Nei, takk."

En við létum samt sannfærast og fyrsta myndatakan fór fram í Frímúrarabyggingunni. Sem var í sjálfu sér nógu galið, með risastórri kapellu með hásæti fyrir kónginn, eða guð veit hvað. Engar naktar dömur, en mórallinn var góður og við vorum spurðir hvort við nenntum ekki að mæta eldsnemma næsta morgun. Svo á Laugardaginn, kl. 8 um morguninn mættum við svo á Plaza Hotel allsvakalega þunnir eftir útiferð til kl. 5 nóttina áður.

Ég get samt ekki ímyndað mér betri þynnkudag. Þarna vorum við, strákagengið, klæddir í stóra sloppa og teatergrímur, settir niður í stóla þegar alltíeinu fleygja stelpurnar allar fötunum sínum. Það myndaðist þvílík grafarþögn. Við, klæddir í eins mikið og mögulegt er. Þær, klæddar engu nema háhælum og grímu.

Frekar vandræðalegt þegar þær, af og til, gripu okkur í að stara óviðeigandi á ákveðna líkamshluta þeirra. En þetta var samt frekar afslappað, enda þær líka sóðalega þunnar.

Þetta var, án efa, minnisverður dagur.

Ég skal nokk reyna að finna myndirnar þegar þær koma út.

En nú að einhverju öðru:

Sælir

2008-02-09T20:23:00.000Z

Ég er lifandi.

Flest ykkar vita þetta núna, en kannski ekki allir. Ég og Louisa erum hætt saman. Allt er í góðu samt sem áður. Ég drekk kannski aðeins meira en ég gerði fyrir, en ekkert í óhófi.

Ég er nú enginn róni! En í öðrum fréttum er að ég er líka hættur í skólanum mínum. Ég ákvað að þrátt fyrir að finnast mjög gaman að forrita að forritunarnám (eða kannski bara nám, yfirhöfuð) var "ikke noget for mig."

Þar af leiðandi hef ég ótakmarkaðan tíma til að einbeita mér að mismunandi kreatívum hlutum. Ég er t.d. að vinna í tónlistarmyndbandi fyrir Hjortene. Þar að auki er í plönunum að byrja að gera fleiri myndasögur í Heimilisfræði seríunni.

Ég bý á Amager núna, deili herbergi með Steffen. Húsið er hið alræmda Amagerhús, sem er svona svipað og Huset på Christianshavn, nema bara með fullt af þunnu fólki sem gerir ekki neitt allan daginn.

En núna ætla ég að fara út að drekka, eins og mér er lagið, ekki?

Myndband Vikunnar:

Kareókí kóngarnir

2007-12-27T13:49:00.000Z

Kannski er þetta vídeó old news en pabbi minn sýndi mér þetta og það tók mig langan tíma að sætta mig við það að þetta væri ekki einhverskonar skitsa í grínþætti.

Besta dæmið er klárlega þegar Grétar Þór er spurður hvort hann laði að sér fleira kvenfólk eftir að hafa hafið Elvis kareókí söngferil sinn og svarar:

"Nei, voða lítið. Maður giftur og þá hefur maður ekkert áhuga á að pæla í öðru."

"Hamingjusamlega giftur?"

"Bæði já og nei. Maður hefur ekki séð konuna sína í heilan mánuð og maður veit ekki hvar hún er eða neitt, sko. Hún hvarf bara 6. des og hefur ekki sést síðan og ekki einu sinni látið heyra í sér eða neitt, sko."

"Jæja... við förum nú ekkert meira út í þá sálma."

Skötubankinn

2007-12-23T15:39:00.000Z

Ég lifði þetta af.

Staðurinn hét Skötubarinn, en þegar við mættum voru engin laus borð. Það kom mér frekar mikið á óvart. En þetta er nú að sjálfsögðu háannatími hjá Skötubarnum.

Fékk smá smjörþef af hvurslags týpur var að finna á Skötubarnum. Því þegar við biðum eftir borði og ég skrapp út til að reykja af mér lyktarskynið komu tveir menn út og einn þeirra spyr hinn: "Hvað heitir þessi staður?" Hann horfir lengi á skiltið og segir að lokum "Skötubankinn." Gott hjá þér, hugsa ég.

Inni í brælunni setjumst við svo og fáum bjór og brennivín, það síðarnefnda semsagt nauðsynlegt ef þú ætlar að koma skötunni niður. Og hið fyrrnefnda til að deyfa öll önnur skynfæri, aðallega vitið sem annars gerir allt til að koma í veg fyrir að maður láti upp í sig eitthvað svo úldið og illa lyktandi.

Ég hafði greinilega ekki drukkið nógu mikið af öli, þar sem kroppurinn minn reyndi allt til að stöðva mig þegar ég stakk einum skötubita upp í munninn. Eina leiðin til að kyngja því var að tyggja vel og vandlega þangað til að allt bragðið var farið út sjálfum bitanum yfir í munnvatnið mitt. Þá tók restin af líkamanum við þessum bita og tungan fór að heimta brennivín til að skola öllu munnvatninu öruggt niður hálsinn.

Eftir það var matarlystin ekkert sérstaklega stór, en mér tókst samt að klára skötustykkið mitt. Fríða hélt því fram að skatan væri ekkert sérstaklega slæm þangað til að hún komst að því að hún hefði í raun fengið sér saltfisk. Og Louisa stakk upp á tveimur mismunandi verðmöguleikum fyrir hlaðborðið, fólk sem er að borða í fyrsta skipti og fólk sem hefur borðað áður. Svolítið ósanngjart að við séum að borga jafnmikið fyrir einn bita af skötu og óeðlilegar mannverur sem geta troðið í sig heilli skötu.

Ég get ekki ímyndað mér annað en að þessi siður verði bráðum útdauður.

Skötudagur

2007-12-23T12:47:00.000Z

Jæja, nú hef ég samþykkt að fara með foreldrum mínum að borða skötu. Ef ég lifi það ekki af, þá óska ég ykkur öllum gleðilegra jóla.

Farsælda Frón

2007-12-19T14:08:00.000Z

Jæja, þá er ég mættur. En núna þarf ég að gera verkefni, þannig að ég er smá upptekinn.

Sælir

2007-12-13T22:16:00.000Z

Ég hef haldið frekar lágum prófíl yfir nýjum ferili mínum, en þar sem ég byrjaði í tölvunarfræði í Københavns Universitet hér fyrir ekki alltof löngu síðan ákvað ég að hefja smá tölvuspils, tja.. smíði? Og viti menn, er ekki kallinn bara búinn að vinna enn eina keppnina í ár.

Tjékkið á spilinu. Ekkert sérstaklega avanserat spil, en vonandi skemmtir það ykkur örlítið.

Sigríður Eir Zófaníasdóttir kom í heimsókn, bara til að heimsækja mig (það er lygi, en hún heimsótti mig samt líka..) um daginn. Áhugavert er að nefna að orðið selskap er nú, ef það var ekki fyrir, orðið íslenskt orð.

Og þá er líka við hæfi að kynna nýjan, mjög spennandi lið í blogginu mínu.

Orð sem hljóma ekki vel í fleirtölu #1 :

selsköp

Viðtöl

2007-11-08T23:28:00.000Z

Ég fór í viðtal í dag.

Fyrir vinnu í Det Ny Teater sem svona senugaur. Gaurarnir sem maður á ekki að sjá í leikriti, en sjást samt einhvernveginn alltaf smá. Þetta var mjög fínt viðtal en eftir viðtalið var ég frekar leiður. Af því að þegar viðtalinu var lokið hugsaði ég "Vá, mig langar að vinna hér!" en svo hugsaði ég "..en það krefst þess að ég er þarna nákvæmlega þegar ég á að vera að taka próf í skólanum mínum." Þannig að núna get ég ekki gert neitt annað en að ímynda mér hvernig það hefði verið að vinna þarna.

Og fara að vinna í lager-vinnu með innflytjendum. Að snúa pökkum við þannig að strikamerkið liggi upp.

Eins og það sé alltof krefjandi fyrir manninn sem les af strikamerkinu.

En viðtalið var samt mjög fínt. Gekk vel. Ég sagði þeim að helsti veikleiki minn væri að ég krefst breytinga í lífi mínu og að styrkur minn lægi í að vera opinn fyrir nýjum upplifunum.

Sem er eiginlega nákvæmlega sami hluturinn.

Og ég lærði að Det Ny Teater er eina prívat-rekna leikhúsið í Danmörku, eða Kaupmannahöfn (gaurinn talaði svo lengi um þetta að ég gleymdi eiginlega öllu sem hann sagði jafnóðum) sem er rekið með hagnaði. Sem er ástæðan fyrir lágum launum þarna. Sem um leið orsakar góðan vinnumóral, af nauð. Eða var það nauðsynlegt að hafa góðan móral, því annars siturðu bara uppi með lélegan móral og lág laun?

Allaveganna, ég myndi aldrei skrifa allt þetta um viðtalið sama dag og ég fór í það ef ég væri ekki viss um að þurfa að afþakka, ef ég fengi vinnuna. Af því að einn af gaurunum var íslendingur og gæti þess vegna fundið þessa færslu og lesið hana og sagt "Þessi gaur fær ekki vinnuna."

Mamma og pabbi, ef þið eruð að lesa þetta, ég skal koma á Skype á morgun.

Nýtt númer og ný frænka

2007-11-06T18:16:00.000Z

Ég ákvað að skipta um númer um daginn, af ástæðum sem ég vill helst ekki fara út í.. Djók, það var ekkert spennandi. Hata bara símafyrirtækið sem ég var hjá. Nýja danska númerið mitt er: 6076 4048

Ég fór í gær að hitta nýjju frænku mína, litlu stelpuna þeirra Aldísar og Sigurjóns. Fékk að halda á henni þangað til að hún opnaði augun og fattaði að ég var ekki pabbi hennar og fór að gráta.

USS!

2007-10-16T22:24:00.000Z

Þessi gaur er geðveikur! Elska þennan stíl.

In Rainbows

2007-10-16T17:43:00.000Z

Ef einhver var ekki búinn að taka eftir því, þá gáfu Radiohead nýjasta diskinn sinn út á netinu. Ókeypis, eða á verði sem þú ákveður alveg sjálfur. Diskinn getiði nálgast hér. Góð plata, en fyrst og fremst mikilvæg plata.. þúst, fyrir tónlistardreifingar... söguna. Já.

Allt gott að frétta hér á bæ, annars. Þarf að drulla mér að sækja um vinnu, og er að vinna að tónlistarmyndbandi fyrir metalhljómsveit. Svedigt!

2007-09-28T12:07:00.000Z

Hola! Jæja, ef þið viljið vera rosalega kúl þá klikkið á myndina og kjósið mig, þá er möguleiki að ég vinni eitthvað. Ég veit ekki hvað ég vinn... bolinn minn eða eitthvað álíka. Kannski peninga. Hver veit? En það er kúl. Mjög kúl.

Bountee

2007-09-24T21:47:00.001Z

Ef ykkur vantar boli, þá eru þetta ekkert.. þúst.. verstu bolir sem maður gæti keypt.

Heimilisfræði komin í prent!

2007-08-22T10:19:00.000Z

Ef þið skellið ykkur til Danmerkur, þá mæli ég eindregið með því að blaða í Ágúst útgáfu Free Comics. Afar skemmtileg útgáfa.

Íslendingur í hjarta og blóði..

2007-08-09T08:36:00.000Z

..en danskur samkvæmt lögum!

Heimilisfræði #30!

2007-08-05T21:30:00.000Z

Jæja, eflaust einhver ykkar sem langaði að sjá nýja Home Ec. myndasögu eftir glæsilegan sigur, hér um daginn. Kannski dálítið sorgleg, þessi..

Zulu Sommerbio #3

2007-08-02T10:21:00.001Z

Ég skellti mér út í Sommerbíó í gærkvöldi.

Zulu Sommerbio #3, Østre Anlæg, SURPRISE FILM:

Ég var voða spenntur yfir þessu Surprise Film dæmi, þar sem vinur minn Luis tilkynnti mér að það væru oft sýndar bíómyndir sem eru ennþá í kvikmyndahúsunum hér. Mjög spennandi. En ég fékk engan til að fara með mér, þannig að ég endaði með að fara aleinn þangað. Sem var ótrúlega leiðinlegt. En myndin var góð. Quentin Tarantino's Death Proof. Æðislega skemmtileg "drasl" mynd. --Mynd 5/5, útibíóupplifun 1/5

Zulu Sommerbio #1 og #2

2007-07-31T18:33:00.000Z

Fyrir þá sem ekki þekkja þetta fyrirbæri þá er Zulu Sommerbio svona einskonar míníatúr drive-in bíó, þar sem þú mætir ekki í bíl heldur bara með stól og gott skap.

Núna hef ég lokið tveimur slíkum ferðum. Báðar ferðir voru ansi stutt frá heimili mínu, nefninlega í garðinum fyrir utan svalirnar mínar.

Zulu Sommerbíó #1 - 25. júlí í Enghave Park - De Andres Liv:

Frábær mynd. Ótrúlega hörð. Sögukunnátta mín er talsvert lítil.. eða engin, og þess vegna var ég svolítið óviss hvað var nákvæmlega í gangi og afhverju. En undir lokin skipti það engu máli. Frekar hefðbundin mynd en mjög óhefbundin saga, og manni finnst ótrúlegt að það sé svo stutt síðan svoleiðis hlutir gerðust. Í miðri mynd löbbuðu fjórir blindfullir menn framhjá og öskruðu yfir myndina. Og við sátum á asnalegum stað. -- Mynd 5/5 stjörnum, útibíóupplifun 3/5

Zulu Sommerbíó #2 - 26. júlí í Enghave Park - Shooter:

Myndin byrjar á því að vinur aðalgaursins og aðalgaurinn eru að njósnast í stríði og skjóta fólk í laumi. Í fyrsta skoti myndarinnar segjir vinurinn "Ah, get ekki beðið eftir því að hitta konuna mína aftur." og sýnir aðalgaurnum mynd af henni. Obbosí. Gaurinn deyr nánast áður en hann nær að setja myndina í vasann sinn aftur. En, Danny Glover leikur í henni. Við sátum á besta stað í heimi, en svo byrjaði að rigna í miðri mynd þannig að mér varð kalt og fannst myndin aldrei ætla að enda. -- Mynd 1/5, útibíóupplifun 3/5

Enn sem komið er hefur hvorug ferðanna toppað síðasta árs Zulu Sommerbio þegar ég fór að sjá Walk the Line og sat upp á þaki á stað sem heitir Øknsehallen. Fólk klappaði og hrópaði "húrra" þegar þau kysstu hvort annað í lokin.

Myndir sem ég mun mjög líklega sjá undir berum himni á næstunni: Borat, The Departed, Casino Royale, Thank you for smoking og Volver.

Tour de France

2007-07-18T18:43:00.000Z

Eins og ávallt þá kemur góða veðrið fyrst þegar maður þarf að sitja við tölvuna að vinna. Lífið er ósanngjart.

Hvað er samt pælingin bakvið íþróttir þar sem engum, ekki einu sinni áhangendum, finnst skemmtilegt að horfa á þangað til að einhver meiðir sig? Formúla 1, Tour de France. Jæja, ok. Það er víst fólk sem finnst gaman að horfa á Tour de France þegar þeir.. hjóla upp brekku. En þá erum við mjög líklega einungis að tala um fólk í Danmörku, þar sem hjólatúr upp brekku er álíka auðfundinn og fjögra laufa smári eða skilvirkt strætókerfi á Íslandi.

Annars er meiri hlutinn af fólkinu sem horfir á þetta að bíða eftir því að einhver detti og rífi búninginn sinn og sýnir smá rass í myndavélina. Eða að einhver fái dekk í hausinn. Og deyr. Voru stríðsfréttirnar ekki nóg?

Hæ Halla

2007-07-09T15:56:00.000Z

Einmana kómhending hennar Höllu frænku við síðustu færslu vekur upp þessar tvær spurningar: Er Halla sú eina sem les þetta blessaða blogg, og Lítið að gera, Halla?

Ég gæti blaðrað endalaust um samband mitt og Louisu, en það væri ekkert sérstaklega skemmtilegt. Allt gengur eins og ganga á í flestum samböndum. Sérstaklega ef tekið er til greina að ég hef aldrei áður búið að heiman í lengur en einn mánuð og að núna eru liðnir 6 mánuðir síðan ég flutti að heiman. Semsagt, alveg glimrandi vel.

Ég er væntanlega að taka upp danskan ríkisborgararétt innan skamms, enda fer íslenskukunnátta mín dvínandi degi hverjum. Og ef allt fer eftir áætlun fæ ég bráðum borgað fyrir að lesa tölvunarfræði í Háskólanum í Kaupmannahöfn. Ekki hafa áhyggjur yfir því að þetta komi niður á listrænu hliðinni minni. Ég kýs bara að hafa allar dyr opnar fyrir mér, svona á meðan maður er ennþá ungur.

Og, að lokum, þá spurði Louisa mig áðan hvort ég mundi eftir einhverju vandræðalegu sem ég hefði lent í og ég svaraði að ég hefði einu hlegið svo mikið að ég pissaði í buxurnar. En að það vandræðalegasta hafi verið að ég pissaði ekki í buxurnar heldur upp í peysuna mína.

Knús úr danskri sól! (akkúrat núna, að minnsta kosti..)

Studio 60 on the Sunset Strip

2007-06-24T18:36:00.000Z

Ég hef ekki skrifað neitt markvert hér í mjög langan tíma. Af þeirri ástæðu eru væntanlega ekkert sérstaklega margir sem lesa þetta. En, ef eitthvað á að standa á þessari vefsíðu þá er það þetta hér.

Studio 60 on the Sunset Strip er sjaldséð þáttaröð. Hún er frumleg, vel skrifuð, vel leikin, fyndin. Og, af því að bandaríkjamenn horfa ekki nógu mikið á Studio 60, er núna búið að ákveða að hætta gerð þáttanna. Sem er ömurlegt, því þetta er ein besta þáttaröð sem ég hef haft ánægjuna af að sjá í langan tíma. Ég nenni eiginlega ekki að þylja upp hvað þættirnir fjalla um.

Ég skrifa þetta bara í þeirri von að fólk sjái þessa þætti og skemmti sér jafnvel og ég hef gert síðastliðna 20 þætti. Serían á ekki nema einn þátt eftir í Bandaríkjunum og því kjörið tækifæri að skella sér í dávnlód eða, ef þú átt Stöð 2, horfa á þá.

Og ef þér finnst þeir skemmtilegir, þá mæli ég eindregið með Sports Night. Sería frá 1998 eftir sömu menn og gera Studio 60, og einu sinni gerðu West Wing.

Ef þú nenntir ekki að lesa allt þetta, þá sagði ég í mörgum orðum þetta: Sjáðu Studio 60 on the Sunset Strip og Sports Night!

2007-05-25T09:50:00.000Z

Hérna er svo nýjasta verkefnið sem ég hef nýverið lagt lokahönd á. Auglýsingamynd um gamla lýðháskólann minn, Borups. Kemur til með að keyra á forsíðu nýrrar heimasíðu skólans.

Kannski skemmtilegt að sjá fyrir þá sem fengu aldrei að kíkja inn í blessaðan skólann minn.

Auglýsingar

2007-05-14T18:24:00.000Z

Auglýsingar eru svo mikið æði. Þær miðla upplýsingum, sannleika og skemmtun allt í einu stuttu andartaki. Ég elska auglýsingar.

Nei. Guð, hvað auglýsingar eru pirrandi. Og góðar auglýsingar eru líka þær verstu. HP tölvur? Tölvur eru persónulegar á ný?! Snilldar slagorð. Allir hugsa "Hey, ef gaurinn úr OC Choppers notar þær fyrir skjöl, ljósmyndir og tónlist þá get ég það líka." "Vá, getur hún semsagt skoðað allt það sem hún helst vill skoða, á Google?!" Þetta er mesta snilldar auglýsingaherferð allra tíma. Tökum allt sem að allar tölvur geta gert og segjum að Hewlett Packard sé eina tölvan sem, í rauninni, geti það. Ég hata það. En elska það.

Og hey, fáðu þér sjónvarp sem varpar ljósi úr afturendanum á vegginn af því að "þú vilt það!" Ég hugsaði sjálfur, "Já, heyrðu. Það gæti alveg verið kúl-" NEI! Í örskamma stund gleymdi ég að ég hata nú þegar að sjónvarpið mitt, venjulega sjónvarpið mitt, varpar svo miklu ljósi á vegginn fyrir framan það. Núna langar mig allt í einu í meira ljós?!

Auglýsingar eru ógeðslegar og ógeðslega góðar. Og allir hata að elska þær.

Jó-jó!

2007-05-10T20:48:00.000Z

Vá! Fékk Andrésar Andar blað með jó-jói, og djöfull hef ég aldrei verið jafnsvalur áður.

Nýjasta verkefnið!

2007-05-06T09:13:00.000Z

Jæja, þá er ég loksins búinn með nýjasta verkefnið mitt. Verkefnið eru tvær teiknimyndir sem Helgi Rafn samdi tónlist við.

Teiknimyndirnar getiði horft á heimasíðunni minni. Ahead of the Game, sú fyrsta og svo A Blue Day.

Ég er alveg ótrúlega ánægður með útkomuna og alveg magnað hvað tónlistin hans Helga veitir miklu lífi í teikningarnar mínar. Vil einnig þakka hinum tveimur hljóðfæraleikurunum, Greta Salóme Stefánsdóttir og Þráinn Hjálmarsson, fyrir afbragðs hljóðfæraleik.

P.S. - ef þið getið, af einhverjum ástæðum, ekki séð teiknimyndirnar í vafranum ykkar þá er þær að finna á YouTube hér og hér.

Gleðilegar fréttir!

2007-04-19T20:48:00.000Z

Stuttu eftir pappírsstúss vegna ríkisborgararétts bárust mér fregnir í síma. Sumir tóku kannski eftir því að ég tók þátt í myndasögukeppni á vegum DR (ríkisútvarp Danmerkur.)

Í símanum tilkynnti kona mér að ég hefði unnið og ekki lélegri verðlaun en 5000 danskar krónur. Ekki léleg tímalaun, þrátt fyrir að þau komi seint.

En já, vil þakka ykkur öllum fyrir að hafa skoðað myndasögurnar mínar svona gegnum súrt og sætt. Vonandi get ég losað hugmyndastífluna einhverntímann og hafið vinnu á þeim á ný.

Að verða danskur ríkisborgari..

2007-04-18T12:41:00.000Z

Er algjörlega, gjörsamlega ómögulegt! "Við getum ekki tekið við þessu, fyrr en þú sendir okkur þetta." "Við getum ekki sent þér þetta, fyrr en þú fyllir út þetta." "Við getum ekki tekið við þessu fyrr en þú hefur útfyllt það sem við getum ekki sent þér."

Mér líður eins og einhver hafi ælt Hitchhiker's Guide to the Galaxy yfir lífið mitt.

Pan's Labyrinth

2007-03-14T23:20:00.000Z

Það er mjög líklega löngu búið að sýna Pan's Labyrinth á Íslandi. En ég fór á þessa mynd í kvöld og hún kom hressilega á óvart. Án efa besta mynd sem ég hef séð í langan tíma. Virkar á alla vegu. Án þess að eyðileggja hana fyrir þeim sem ekki hafa séð hana get ég sagt að maður upplifir allar tilfinningar aðalsögupersónunnar. Tæknilega séð er myndin líka fullkomin. Tempóið er hárrétt. Maður situr aldrei og byrjar að giska á hvað gerist næst né á í erfiðleikum með að fylgjast með. Og þvílíkt augnyndi á köflum.

Að lokum er hún líka temmilega brútal, svona svo að við karlarnir getum haldið fyrir augun á stelpunum. Já, og engan veginn barnavænleg.

Fimm stjörnur. Klárlega.

Ugh.. grátt hár

2007-03-13T10:53:00.000Z

Afhverju í ósköpunum fæ ég grátt hár? Ég er 21s árs gamall og fæ grátt hár?! Ég er viss um að þetta er einhver genatengdur húmor frá mömmu.

Stutt heimsókn

2007-03-11T19:51:00.000Z

Viðburðarrík helgi sem hófst með mjög stuttri heimsókn frá Íslandi. Táta og Gutti, kettirnir hennar Freyju, millilentu hér á leiðinni út til Brighton.

Frekar mikið pappírsvesen í kringum þetta en í lokin var heimsóknin mjög kærkomin. Þá er ég bæði búinn að passa hunda og ketti hér á Lyrskovgade.

Í gær var svo ætlunin að ég og kærastan færum saman í bæinn. Höfum ekki farið saman út að drekka síðan við vorum í skóla saman, þannig að eitthvað varð að gera í því. Byrjar ágætlega en ég enda talsvert fullur og þá byrjum við að rífast eitthvað smá. En svo endaði kvöldið æðislega og við fórum sátt heim. Leigubílstjórinn var í stuði og skemmti okkur allverulega á leiðinni heim.

Svo er þynnkudagur í dag og ég uppgötvaði nýjan veitingastað rétt hjá okkur. Afbragðsmatur, sérstaklega í svona þynnkustuði. Núna er svo kominn tími til að horfa á 3000 Miles to Graceland.

Er að hlusta á Guero - Beck

Það er eitthvað að malla..

2007-03-02T21:47:00.000Z

Ég hef frekar stórar fréttir að færa. Mér hefur verið boðið lærlingastarf sem klippari hjá kvikmyndafyrirtæki í eitt ár. Eftir þetta ár, ef ég er nógu góður, ráða þeir mig í fullt starf.

Við erum að tala um skítalaun, þannig að ég kem væntanlega ekki í heimsókn til ykkar, en þetta er náttúrulega búið að vera frekar stór draumur í einhvern tíma.

Sjáum svo hvernig þetta fer.

Stille og roligt

2007-02-27T11:02:00.000Z

Hey, vó! Hvað kom fyrir jonkk.dk? Ég skal segja þér það!

Eiginlega ekkert mikið, en ég setti skemmtilegan fítus á síðuna þannig að núna geta litlu "málverkin" mín verið á forsíðunni (sem meikar miklu meiri sens þar sem að þau eru ekkert sérstaklega mörg.

Og fyrst ég var að breyta því gat ég alveg eins breytt útlitinu örlítið.

En í fréttum er að ég er búinn að hringja í fólkið sem ræður því hver verður danskur ríkisborgari. Og ég lærði hvað orðið sølle þýðir. En já, svo lengi sem íslenska ríkisstjórnin getur lifað af án mín er ég á leiðinni að verða Dani.

Hvað er í gangi?

2007-02-25T23:18:00.000Z

Hvad sker der? Que onda, Jón?

Já, maður spyr sig. Hvað er Jón að bralla. Akkúrat núna er ég að reyna að slappa af eftir talsvert brjálað vinnu sessjón. Brátt fer ég og heimsæki Sara Koppel í teiknimynda stúdíóið hennar og hef ákveðið að undirbúa mig fyrir vonbrigði þegar ég spyr hana hvort hana vanti hjálp. En hey, maður fær ekkert ef maður tekur ekki sjénsinn.

Ef þið fylgdust grannt með myndasögunum mínum gæti verið að ykkur finnist spennandi að ég er byrjaður að senda nokkrar af þeim í myndasögukeppni DR. Ef þið getið fundið þær, þá getið þið gefið þeim stjörnugjöf hér.

Og hey, ef þið komið hingað seinna og það er ekkert nýtt að frétta hjá mér gæti samt verið þess virði að kíkja í hliðarröndina. Þar hef ég sett upp einhverja nýja pælingu sem sýnir hvað ég tel vera þess virði að lesa. Akkúrat núna er einungis mjög fyndin grein um vænusjúkan skóla í Bandaríkjunum og feministískar vangaveltur Olgu. En bíðið bara, innan skamms verður allt morandi í greinum þarna.

Velkomin(n)

2007-01-16T19:20:00.000Z

Þrátt fyrir harða mótstöðu frá Olgu, ákvað ég að endurheimta gamla addressu mína á thejko.blogspot.com.

Fyrir þá sem ekki vita það, þá var bloggið mitt flutt yfir á bigjko.blogspot.com og ég lenti í vandræðum með thejko addressuna. En já, þau sem hafa reynt að komast inn á bloggið mitt undanfarið - velkomin aftur.

Og ef þú ert að velta því fyrir þér hvað varð eiginlega um myndasögurnar þá er bara búið að vera mikið að gera hjá mér. Það, auk smá leti og hugmyndaleysi. En þær eru væntanlegar aftur innan skamms.

Dagur 6

2007-01-15T17:45:00.000Z

Eins ótrúlegt og það virðist, eru framleiðendur þáttaraðanna 24 mjög gott á leið með að toppa sjálfa sig. Til þess að toppa fyrsta þátt seríu 5 var ekkert annað mögulegt en að einfaldlega sýna fjóra þætti í röð þegar nýja serían byrjaði. Þessir fjórir þættir eru ekkert annað en magnaðir.

Segi ekkert meira, þið verðið að sjá þetta sjálf.

Afsakið leiðinlegheit

2007-01-09T13:33:00.000Z

Svo virðist sem að mér hafi tekist að fokka upp í blogginu mínu. Allverulega, í þetta skiptið. Gamla addressan sendir mann fljúgandi yfir á síðu sem ekki finnst. Og því hef ég tekið upp á því, til að redda þessu, að nota hið aldagamla veffang bigjko.blogspot.com. En spurningin er núna, á ég bara að halda því veffangi eða á ég að reyna að redda thejko?

Hvað finnst ykkur?

Orðinn þreyttur á gamla útlitinu..

2007-01-08T20:26:00.000Z

Svo er Blogger kominn með einhvern nýjan þægilegan uppfærslu fítus á útlitið. Svona er þetta, nýjum tímum fylgja breytingar.

Sælulíf

2007-01-08T19:17:00.000Z

Sælulífið í Danmörku tekur smá pásu. Allt húsið er nefninlega í viðgerðum. Nánara sagt klósettviðgerðum.

Það þýðir að í staðinn fyrir að gera þarfir mínar í ró og næði í íbúðinni þarf ég núna að dröslast alla leið út í frekar óþægileg Badeværelse på hjul, eins og Danirnir kalla það. Næstu þrjár vikur, skilst mér.

Fyndið hvernig maður þarf að missa hluti til að átta sig á því hversu mikið maður eiginlega metur þá.

Jæja, það hlaut að gerast einhverntímann

2007-01-07T12:16:00.000Z

Ég er núna opinberlega búinn að feta eitt lítið skref í hin allmörgu fótspor foreldra minna. Ég vinn á leikskóla. Hver veit hversu lengi ég held þessu starfi, en ég nýt þess enn sem komið er. Aðalgæslukonunni tókst samt að hræða mig smá í byrjun þegar hún ráðlagði hinum unga og saklausa mér að setja sjálfan mig ekki í aðstæður með börnunum sem gætu misskilist. Sú orð trufluðu mig allsvakalega á tímum þegar ég þurfti að hjálpa börnunum við ósköp venjulega hluti, eins og að renna upp buxnaklaufinni.

Nýtt ár er gengið í garð og svo virðist sem að nýr Jón þurfi að brjótast út ef ég ætla að lifa af í mínu nýja umhverfi. Reikninga þarf að borga, vinnum skal sinnt og hús þarfnast þrifnaðar. Ég held samt áfram fast í gamla Jón svo hægt sé að grípa til ofurdrykkju og skemmtilegheita þegar það er viðeigandi.

Lífið er alltaf best í jafnvægi.

Gleðileg Jól!

2006-12-25T14:28:00.000Z

Eitt stykki jólamyndasaga handa ykkur, börnin góð!

Ég óska ykkur öllum gleðilegra jóla, og farsældar á nýju ári. Hér sit ég í stofunni í nýju íbúðinni minni sem ég er nýbúinn að flytja inn í með kærustunni minni. Og að halda jól í Danmörku með Dönum var engan veginn slæmt. Dönsuðum og sungum og borðuðum önd. Og núna eigum við örugglega allt sem við þurfum í eldhúsið.

Hafiði að gott.

Vá..

2006-12-19T13:03:00.000Z

Ég er motherfucking búinn með MH. Ég þakka fyrir mig.

Svona leit ég út eftir prófin

2006-12-14T18:20:00.000Z

Já, kæru vinir. Ég er búinn í prófum. Eða, þ.e.a.s. ef ég fell ekki. Ef ég fell ekki er ég búinn með MH.

Og já, getið séð alla myndina af mér eftir stærðfræðilestur hér. Skemmtilegt þegar hægt er að nýta próflesturinn í eitthvað skapandi.

Þú ert.. kjánalegur!

2006-12-10T16:28:00.000Z

Ég hef oft lesið gagnrýni og verið ósammála henni, en mér var nett ofboðið þegar ég las þessa litlu grein um Helga og nýju plötuna hans. Eða réttara sagt Helga og nýja plötubæklinginn hans.

Já, greinin fjallar skemmtilega lítið um diskinn og afar mikið um litla bæklinginn sem fylgir með diskinum hans. Hún byrjar ágætlega á því að lýsa því yfir að honum lítist ekki á söng hans, en rökstyður það ekkert frekar og fer að rakka niður smámuni, eins og þá staðreynd að Helgi er með make-up á coverinu.

Mér leið svolítið svipað og þegar maður heyrir smákrakka, með takmarkaðan orðaforða, rífast um hvort Turtles eða He-man séu betri. "Nei.. He-man er kjánalegur! Hann er í sundskýlu og.. og er ljóshærður og kjánalegur!!"

Hverjum er ekki sama?! Hann getur barist við Skeletor! Halló!

Viðbót: Egill orðar þetta mjög vel: "..ef einhver hefði bundið fyrir augun á gagnrýnandanum og sett diskinn á og ekkert sagt honum hvað hann væri að fara að hlusta á þá hefði hann fengið frááábæran dóm"

Menntaskólinn við Hamrahlíð uppfærist

2006-12-08T17:09:00.000Z

Með nýrri byggingu kemur að sjálfsögðu ný síða sem sendir MH stolt yfir í framtíðina. Ótrúlega flott heimasíða, langtum betri en sú gamla, og finnst mér að allir ættu að gefa tölvukörlunum eitt stórt klapp!

Heimilisfang

2006-12-07T15:53:00.000Z

Núna styttist í ferð mína aftur til Danmerkur og eflaust sum ykkar farin að spyrja sig, "En hvar býrðu þá, Jón?" Ég skal segja ykkur það, kæru lesendur:

Jón Kristján Kristinsson
Lyrskovgade 16, st. tv.
1758 København V
Danmark

Vonandi fæ ég einhver æðisleg jólakort eða eitthvað.

Jæja!

2006-12-03T21:44:00.000Z

Þá er búið að ákveða að ég verð áfram á Íslandi í nokkra daga og mun því upplifa útskriftina mína. Þar af leiðandi verður útskriftarveisla, vúhú!

En í aðeins léttari fréttum er nýjasta myndasagan komin út, þrátt fyrir prófstress. Stærðfræði á morgun, óskið mér góðs gengis.

The Great Giana Sisters!

2006-11-28T19:32:00.000Z

Hérna kemur ein gasalega skemmtileg tölvuspila staðreynd. Við getum kallað þetta Spilastaðreynd nr. 1.

Allir kannast við Super Mario. Vinsældir hans urðu til þess, eins og oft gerist, að allir herma eftir. Flestir gera það án þess að vera of augljósir og sumum tekst jafnvel að gera gott úr. Ein sú skemmtilegasta eftirherma er án efa þessi hér.

Leikurinn The Great Giana Sisters kom út tveimur árum eftir The Super Mario Brothers. Eftirherman er augljós út frá nafninu einu og sér. En eins og það var ekki nóg þá stóð á kassanum "The Brothers are history!" Í staðinn fyrir pípulagningamanninn í rauðu og bláu fötunum er komin heimsbjargandi húsmóðir, í alveg eins fötum, og sveppir prýða einnig framhlið kassans, en eins og allir muna vonandi voru sveppir notaðir til að stækka Mario. Auk þess eru geimskipin sem fljúga í bakgrunninum skuggalega lík fyrsta óvininum sem maður hittir í Mario. En engin er eftirherman ef spilið sjálft er ekki nákvæmlega eins en sú var klárlega raunin.

Um leið og leikurinn fer í sölu grípur Nintendo að sjálfsögðu í taumana á málinu og er spilinu kippt úr búðum hið snarasta. Það urðu þó ekki endalok leiksins en enn þann dag í dag eru til aðdáendur. Ef ekki aðdáendur leiksins (sem var að sjálfsögðu dreift um netið þegar sú tækni kom til sögunnar) þá tónlistarinnar sem spilið notaðist við. Síðar var spilið svo endurútgefið á GSM símum.

Þó í þetta sinn einungis undir nafninu 'Giana Sisters'.

The Nintendo Wii

2006-11-28T01:36:00.001Z

Alltaf gaman þegar krakkar fá það sem þeir vilja.

Hvað veit ég um síma?

2006-11-23T23:07:00.000Z

Já, það er ekki oft sem maður spyr sig þessari spurningu. Maður veit hvað sími er. Þekkjum hann betur en eyrað okkar.

En hvað veit maður um síma?

Þeir eru óþolandi
Vekjaraklukkur síma hringja alltaf of lágt
Hæsti hringitóna styrkur er aldrei nógu hár
Símum er hægt að læsa, öllum, þ.á.m. eiganda, til gremju
Þeir eru brothættir, sama hvað símafyrirtækin vilja meina um högghelda síma
Takkarnir eru annaðhvort úr gúmmíi eða ótrúlega óþægilegir
Eða bæði
Það er aldrei auðvelt að setja í/taka út SIM-kort í síma
Af einhverjum ástæðum dettur bakhliðin á síma alltaf af þegar maður missir síma
En samt er bakhliðin það vel fest á að maður á alltaf í erfiðleikum með að opna hann

Já, mér leiðist. Og ég hata síma. Í rauninni ætti þessi færsla að heita 'Afhverju ég hata síma.' En það er ekki nógu töff að hata hluti. Maður þarf að fara fínt í hatur nú til dags.

En að öllu öðru leyti (leiti?) er ég í góðu skapi í dag. Skólaganga mín gengur óvenju vel. Síðustu prófa- og verkefnaeinkunnir hafa allar verið yfir 8. Þeir sem þekkja mig vita að þetta er fáranlega hátt. Og ekki nóg með það heldur er kærastan mín að fara að koma í heimsókn eftir viku. Og hún verður í heila viku. Og mun skera út laufabrauð.

Tala ég of mikið um kærustuna mína? Hún heitir Louisa. Bless.

Jólin eru að koma

2006-11-19T14:42:00.002Z

Ég veit, ég veit. Jólin eru ekki beint á næstunni.

En hvað eru jólin annað en hin góða tilfinning sem maður fyllist af þegar maður er frjáls. Ég myndi til dæmis segja að jólin mín séu 15. desember. Því þá eru góðar líkur á að ég flytji aftur heim til Danmerkur. Þar bíður mín elskuleg kærasta og splunkuný íbúð. Það verða góðir tímar hvort sem um er að ræða afmælisdag Jesúbarnsins.

Ég mæli eindregið með því að allir kíki á bloggið hennar Katrínar, því þar eru á ferð góðar sögur af stefnumótum hennar og vinsældum mínum í Danmörku.

Og þeir sem að muna eftir fyrstu myndasögunni þekkja eggjahrærarann í nýjustu myndasögunni.

Vá!

2006-11-19T14:42:00.001Z

Sjáið snjóinn!

Sálsveitin var æði

2006-11-15T20:20:00.000Z

Ég fór og sá sýningu Lúðrasveitar Seltjarnarness, um Sálsveitina Skuldbinding og verð að játa að hún var æðisleg. Margir voru alveg mjög góðir að leika og brandarnir hittu beint í mark í hvert skipti. Söguþráðurinn var að sjálfsögðu í lægri kantinum en virkaði vel í uppbyggingu að loka tónleika atriði. Uppáhaldsatriðið mitt er án efa þegar upp kemst að rótarinn þeirra er heyrnarlaus. Eiga þau öll skilið hrós fyrir þessa afbragðssýningu (sem ég vona innilega að verði sýnd aftur.)

Í fréttum af mér er annars fátt. Ég sakna ennþá Danmerkur en reyni að njóta lífisins hér á klakanum til hins ýtrasta. Nú virðast vera einhver vandamál með íslenska stafi á þessu blessaða bloggi og nota ég það sem góða ástæðu til að blogga minna.

En já, þið fáu sem ennþá lesið þetta, afsakið bloggleysi.

Hmm, svo virðist sem að íslenskt stafarugl takmarkist einungis við hliðarröndina og lítilvægt rugl. Ég hef enga afsökun.

Fjúff

2006-10-29T13:47:00.000Z

Já, "Fjúff!" heyrðist úr mér þegar ég andaði léttar eftir að hafa fundið bloggsetur Benedikts aftur. Það var enginn að láta mig vita að maðurinn hefði skipt um stað, fyrir all löngu síðan.

Jæja, eins gott að ég fann hann aftur.

Heilagar makkarónur

2006-10-27T17:02:00.000Z

Talandi um guð, samt. Ég skráði mig úr trúnni um daginn.

Kári Swan kom í skólann og var með svona trúskráningsáróður. Ég tjáði honum að ég hefði smátt og smátt áttað mig á að trú mín passar ekki beint við hefðir kristinnar trúar. Þar með þætti mér ekki æskilegt að vera skráður sem kristinn maður. Við leituðum án árangurs að trú sem passaði við mín gildi og hugmyndir. Hana var ekki að finna. Þar af leiðandi var eina ráðið að skrá sig beinlínis úr trúnni.

Er ég þá trúleysingi? Ég trúi klárlega á allskonar krafta í heiminum, líf eftir dauða og jafnvel kraftaverk. En er maður trúleysingi ef maður tilheyrir ekki skráðri trú?

Stærðfræði

2006-10-26T23:02:00.000Z

Stærðfræðilestur fyrir próf er að rokka ofar öllu. Á morgun er skyndipróf og ég má ekki við því að falla í því, kennaraeinkunnin mín er svo hræðileg. Væri geðveikt hresst að prófa að læra í alla nótt, og fara aldrei að sofa. Nema að þá væri ég illa útsofinn fyrir prófið. Slæm pæling.

En góð pæling er hinsvegar að hlaða niður nýrri útgáfu Firefox. Útgáfa 2.0!

Ég skrifaði fyrr um vonir mínar gagnvart vefráði. Nýtt vefráð hefur vægast sagt ekki staðist undir þeim væntingum. Á yfirborðinu virðast þeir hafa fátt annað gert, hingað til, en að breyta útlitinu í eitthvað aðeins skárra en það sem var, ekki setja inn Skaramúss myndir (sem mér er tjáð að sé hluti af starfi vefráðs núna) og fokka upp myndakerfinu. Myndakerfið er hinsvegar búið að laga eftir talsverð símtöl í Kára og Ómar, fyrrum vefráðara.

Ég vona innilega að undir yfirborðinu séu vefræðingar að vinna duglega að einhverju sérstöku, sem réttlætir núverandi sjö manna vefráð.

Ísland - Já takk!

2006-10-18T09:42:00.000Z

Rosalega er ég stoltur af Íslendingum núna. Í u.þ.b. hálfan mánuð hafa nú Bandaríkjamenn trónað á toppinum yfir mestan fjölda heimsókna á www.jonkk.dk en nei. Slíkt vefæði er á enda komið og hafa Íslendingar hertekið fyrsta sætið. Samkvæmt nýjustu tölum eru 37% heimsókna frá Íslandi á meðan aðeins 34% eru frá Bandaríkjunum.

Þess má einnig geta að flestar þessara heimsókna hafa verið gerðar í hinum geysivinsæla og gífurlega góða vafra Firefox.

Til hamingju Ísland og til hamingju Firefox.

Persónulegar Eigur

2006-10-14T18:37:00.000Z

Ef þið eruð ekki búin að sjá það þá er Helgi Rabn búinn að skella þrem lögum til viðbótar við Angelu. Þau er að finna hér. Öll hörkufín, en uppáhaldið mitt er klárlega Dark Lullaby. Hlakka til þegar diskurinn kemur út.

En nóg um Helga. Vinur minn Jakob kemur í heimsókn í nótt og verður alla næstu viku til Sunnudags. Það verður afar hresst og verð ég þá einna helst að passa mig að skrópa ekki í skólanum og svoleiðis. Alveg nógu tæpur á mætingu þar.

Ég hlýt að hafa verið sofandi þegar ég skrifaði þetta. Gleymdi að setja hlekk yfir á lögin hans Helga.

Fínir föstudagar

2006-10-13T17:59:00.000Z

Til þess að berjast gegn skólaleiða hef ég hafið hina gífurlega mannbætandi hefð "Fínir föstudagar." En sú hefð hófst í dag, með því að ég mætti í fína jakkanum mínum í skólann. Pælingin er svo sú að annan hvern föstudag, héðan í frá, mun ég vera fínn og jafnvel gera eða kaupa eitthvað fínt til að vera með í skólanum.

Dagurinn í dag var að minnsta kosti alveg töluvert skárri.